Read Buku Loyera - Chichewa Yob. 30 Bible Online

Yob. 30 - Buku Loyera - Chichewa bible

Yob. 30

¹“Koma tsopano akundiyesa chinthu chochiseka, anthu amene ali ana kwa ine, anthu oti ndi atate ao omwe sindikadaŵayesa oyenera kuti athandizane ndi agalu kuŵeta nkhosa zanga.

²Kodi mphamvu zao zikadandipinduliranji, anthu amene nyonga zao zidatha kale?

³Anali atatheratu kuwonda ndi njala, natsala mafupa okhaokha, ankakungudza nthaka youma yachipululu.

⁴Ankathyola therere ndi masamba a zitsamba, ankadya mizu ya dinde.

⁵Ankaŵapirikitsa pakati pa anthu, anzao ankaŵakuwa ngati mbala.

⁶Ankaumirizidwa kumakhala m'zigwembe za mitsinje, m'maenje am'nthaka ndi am'matanthwe.

⁷Ankalira ngati nyama kuthengo, ndipo ankaunjikana pamodzi pa zitsamba zaminga.

⁸Iwowo anali opusa, achabechabe okhaokha, ndipo adaŵachotsa m'dziko.

⁹“Tsopano ine ndasanduka nyimbo yao, ndasanduka chisudzo chao.

¹⁰Ineyo ndimaŵanyansa, ndipo amandithaŵa. Akangondiwona, salephera kuti malovu nzee m'maso mwangamu.

¹¹Poti Mulungu adandifooketsa ndi kundichepetsa, iwowo adalekeratu kundiwopa.

¹²Ku dzanja langa lamanja anthu achiwawa akundiwukira, akukumba mbuna yoti ndigweremo, akukonzekera njira zondiwonongeratu.

¹³Akunditsekera njira, ndipo akufuna kundichititsa ngozi, palibe wina aliyense woŵaletsa.

¹⁴Akundithamangira ngati madzi oloŵera pa linga logumuka, akubwererabwerera pakati pa chipasupasu.

¹⁵Zoopsa zandigwera. Ulemu wanga wachita ngati kuuluzika ndi mphepo, chuma changa chija chazimirira ngati mtambo.

¹⁶“Tsopano mtima wanga wachokamo. Ndili pa mavuto, ndilibe popumira.

¹⁷Mafupa anga akuphwanya usiku, zoŵaŵa sizikuleka.

¹⁸Chovala changa chakwinyikakwinyika chifukwa cha matenda, chikundithina ngati khosi la mkanjo wanga.

¹⁹Mulungu wandiponya m'matope, ndasanduka ngati fumbi ndi phulusa.

²⁰“Ndimalira kwa Inu Mulungu, koma simundiyankha. Ndimapemphera, koma inu simundiyang'anako.

²¹Inu mwandichita zankhanza, mwandizunza ndi dzanja lanu lamphamvu.

²²Inu mwandiika pa mphepo, mwandinyamula ndi mphepoyo, ndipo mwandiponya mu mkuntho wa namondwe.

²³Tsono ndikudziŵa kuti Inu mudzandifikitsa ku imfa yanga, kumene aliyense adzapitako.

²⁴“Komabe kodi munthu wam'mazunzo satambalitsa dzanja? Kodi salira chithandizo m'mavuto mwakemo?

²⁵Kodi ine sindidalire nawo anzanga amene anali pa mavuto? Kodi mtima wanga sudaŵamvere chisoni anthu osauka?

²⁶Koma pamene ndinkayembekeza zabwino, zovuta ndiye zimene zidandigwera. Pamene ndinkayembekeza kuŵala, mdima ndi umene udandiphimba.

²⁷Mtima wanga ukuŵaŵa, ndikusoŵa mpumulo, masiku onse ndili pa mavuto.

²⁸Ndikuyenda mu mdima popanda dzuŵa konse. Komabe ndimaimirira pa msonkhano ndi kupempha chithandizo molira.

²⁹Kulira kwanga kuli ngati kwa nkhandwe, ndimakhala ndekha ngati nthiŵatiŵa.

³⁰Khungu langa likuyamba kuda ndi kunyenyeka, Mafupa anga akutentha ndi chitungu.

³¹Pangwe wanga wasanduka woimbira maliro, chitoliro changa chikupolokeza anthu olira.” Yobe avomera kuchimwa kwake.