Read Buku Loyera - Chichewa Yob. 32 Bible Online

Yob. 32 - Buku Loyera - Chichewa bible

Yob. 32

¹Tsono anthu atatu aja adaleka osamulankhuzanso Yobe, chifukwa choti iyeyo adaadziwona kuti ndi wosachimwa.

²Koma Elihu, mwana wa Barakele, wa fuko la Buzi, wa banja la Ramu, adapsera mtima Yobe chifukwa chodziyesa wolungama kupambana Mulungu.

³Adapseranso mtima abwenzi ake atatu aja, chifukwa choti sadathe kuyankha, ngakhale iwo omwe adaapeza kuti Yobeyo ndi wolakwa.

⁴Koma Elihu adadikira kuti alankhule ndi Yobe, chifukwa choti abwenziwo anali akuluakulu kupambana iyeyo.

⁵Tsono ataona kuti anthu atatuwo sadamuyankhe Yobe moyenera, adapsa mtima.

⁶Choncho Elihu, mwana wa Barakele wa fuko la Buzi, adayamba kulankhula, adati, “Ine ndine wamng'ono, inuyo ndinu akuluakulu. Nkuwona ndinkaopa, ndipo ndinkachita mantha kuti ndikuuzeni zakukhosi.

⁷Ndinkati ayambe ndi akuluakulu aja kulankhula, chifukwa amvulazakale ndiwo amaphunzitsa nzeru.

⁸Koma mzimu wa Mphambe ndiwo umaloŵa mwa anthu ndi kuŵapatsa nzeru.

⁹Sikuti ukalamba wokha ndiwo umasandutsa anthu kuti akhale anzeru, si kukhwima kokha kumene kumachititsa kuti anthu azimvetsa zimene zili zoyenera.

¹⁰Nchifukwa chaketu ndikuti, ‘Mundimve, lekeni ndinenepo maganizo anga.’

¹¹“Zoona, ndinkadikira mau anuwo, ndinkafuna kumvetsera mau ogwira mtima pamene inuyo munkafunafuna zanzeru zoti mulankhule.

¹²Ndidakumvetseranidi, koma panalibe ndi mmodzi yemwe mwa inu amene adatsutsa mau a Yobe, panalibe amene adayankhako nkomwe.

¹³Chenjerani, musanene kuti, ‘Ife tapeza nzeru, Mulungu ndiye angamgonjetse, osati munthu ai.’

¹⁴Yobe sadalankhule ndi ine, ndipo ine sindimuyankha monga m'mene mwamuyankhira inu.”

¹⁵“Iwowo asokonezeka, sakuyankhanso. Alibe ndi mau omwe oti angalankhule.

¹⁶Kodi ine ndidikire chifukwa iwo sakulankhula, kodi ndisayankhekonso poti iwo angoti phee?

¹⁷Ai, ine ndiyankhapo tsopano. Nanenso ndilankhula zakukhosi.

¹⁸Pakuti ndili nawo mau ambiri, mtima wanga ukundichichiza kuti ndilankhule.

¹⁹Ndithudi, maganizo adzaza mumtima mwanga ali ngati vinyo wopanda pompungulira, ineyo ndili ngati matumba atsopano achikopa ofuna kuphulika ndi vinyo.

²⁰Ndiyenera kulankhula kuti mtima utsike. Pakufunika kuti ndiyankhepo pa nkhaniyi.

²¹Sindiwonetsa kukondera munthu wina aliyense, sindilankhula zoshashalika.

²²Ine sindidziŵa kulankhula mochenjera, kuwopa kuti Mlengi wanga angandilange msanga.” Elihu adzudzula Yobe kuti ndi wodzikuza.