Read Buku Loyera - Chichewa Yob. 34 Bible Online

Yob. 34 - Buku Loyera - Chichewa bible

Yob. 34

¹Elihu popitiriza kulankhula adati,

²“Imvani mau anga, inu anthu anzeru, mutchere khutu, inu odziŵa zinthunu.

³Pakuti khutu limamvetsa mau monga momwe m'kamwa mulaŵira chakudya.

⁴Tiyeni tisankhe zolungama, titsimikize tokha zimene zili zabwino.

⁵Pakuti aYobe anena kuti, ‘Ndine wosalakwa, koma Mulungu akukana kundiweruza molungama.

⁶Ngakhale ndine wolungama, akundiyesa wabodza. Mavuto anga ndi osatha, ngakhale ndine wosachimwa.’

⁷Kodi pali munthu amene angafanefane ndi aYobe? Iwoŵa apambana kunyoza Mulungu.

⁸Amayenda ndi anthu ochita zoipa, amayanjana ndi anthu a mtima woipa.

⁹Paja ankanena kuti, ‘Palibe phindu kuti munthu azikondwerera Mulungu.’

¹⁰“Tsono mumve, inu anthu anzerunu, Mulungu sangathe kuchita choipa, Mphambe sangathe kulakwa mpang'ono pomwe.

¹¹ Amambwezera munthu potsata ntchito zake, munthuyo zinthu zimamgwera malinga ndi mayendedwe ake.

¹²Ndithudi, Mulungu sangachite choipa, Mphambe sangaweruze mosalungama.

¹³Kodi ndani adampatsa Mulungu udindo wolamulira dziko lapansi? Ndani adaika dziko lapansi m'manja mwake?

¹⁴Iye akadalanda moyo wake, akadamulamula kuti mpweya wake ubwerere kwa Iye mwini,

¹⁵bwenzi zamoyo zonse zitaonongeka, bwenzi anthu onse atabwerera ku fumbi.

¹⁶“Ngati ndinu omvetsa, mumve zimenezi, mumvetsere bwino zimene ndikunenazi.

¹⁷Kodi munthu wodana ndi chilungamo angathe kukhala wolamulira? Kodi mungathe kumuweruza Mulungu Wolungama ndi Wamphamvu uja kuti ndi wolakwa?

¹⁸Mulungu amadzudzula mafumu kuti, ‘Ndinu opanda pake,’ amauza akalonga kuti, ‘Ndinu oipa.’

¹⁹Iye sachita zokondera kwa akuluakulu, kapena kulemekeza olemera kupambana osauka, pakuti onsewo Mulungu adaŵalenga ndi manja ake.

²⁰Iwowo amafa mwadzidzidzi, pakati pa usiku Mulungu amakantha anthu, iwowo nkufa, anthu amphamvu amaŵalanda moyo mosavuta.

²¹“Mulungu amapenya njira zonse za anthu, amaona mayendedwe ao onse.

²²Palibe usiku kapena mdima wandiweyani kumene anthu ochita zoipa angathe kubisalira Mulungu.

²³Mulungu sasoŵa kuchita kumuikira munthu wina aliyense nthaŵi yoti abwere pamaso pake kudzaweruzidwa.

²⁴Iye amatsitsa atsogoleri, mlandu wao osaufufuza nkomwe, ndipo m'malo mwao amaikamo ena.

²⁵Iyeyo amadziŵa bwino ntchito zao, amaŵagubudula usiku, iwowo nkutswanyika.

²⁶Amaŵakantha chifukwa cha kuipa kwao, anthu ena onse akupenya,

²⁷chifukwa adapatuka osamtsata, ndipo sankasamala malamulo ake.

²⁸Adaliritsa amphaŵi kuti afuule kwa Mulungu, ndipo Iyeyo adamva kufuula kwa ovutikawo.

²⁹Kodi Mulungu akangoti duu, ndani anganene kuti walakwa? Akabisa nkhope yake, ndani angathe kumpenyabe. Komabe ndiye amene amasamalira munthu kapena mtundu wa anthu,

³⁰kuti asalamulidwe ndi anthu osadziŵa Mulungu, ndipo asakodwe m'misampha yao.

³¹“Kodi alipo amene adauza Mulungu kuti, ‘Ndalangika, sindidzachimwanso,

³²mundiphunzitse zimene sindikuziwona: ngati ndidachita choipa, sindidzachitanso’?

³³Kodi Mulungu akuweruzeni potsata m'mene inuyo mukuganizira, pamene inu mukukana kulapa? Inu ndinu amene muyenera kusankha osati ine. Nchifukwa chake munene zimene mukudziŵa.

³⁴Anthu omvetsa zinthu adzandikambira, anthu anzeru amene akundimva adzandiwuza kuti,

³⁵‘Yobe akulankhula mosadziŵa, mau ake ndi opanda nzeru.’

³⁶Kunali bwino aYobe akadayesedwa mpaka ku mapeto, chifukwa choti amayankha monga m'mene amayankhira anthu oipa.

³⁷Pa tchimo lao aonjezerapo upandu, akunyadira zochita zao, ndipo akuchulukitsa mau onyoza Mulungu ife tilikumva.” Mulungu amasamalira zochitika pa dziko lapansi.