Read Buku Loyera - Chichewa Yob. 35 Bible Online

Yob. 35 - Buku Loyera - Chichewa bible

Yob. 35

¹Elihu adaonjeza kuti,

²“Kodi mukuganiza kuti mukukhoza: Kunena kuti, ‘Ndine wolungama pamaso pa Mulungu?’

³Kapena kufunsa kuti, ‘Kodi kuchimwa kwanga ubwino wake ndi wotani? Nanga ndikadapindulanji ndikadaleka kuchimwa?’

⁴Ndidzakuyankhani inuyo ndi abwenzi anu omwe.

⁵Muyang'ane kumwamba, ndipo muwone mitambo imene ili kutali ndi inuyi.

⁶ Kodi mukamachimwa, ndiye kuti mukumchita Mulungu chiyani? Mukamachulukitsa machimo anu, kodi mumamvuta bwanji?

⁷Kodi mukati ndinu wosalakwa, ndiye kuti mukumpindulira chiyani? Kodi angathe kulandiranji kwa inu?

⁸Kuipa kwanu kumangovuta anthu anzanu, chimodzimodzinso ntchito zanu zabwino zimangopindulira anzanu basi.

⁹“Anthu akufuula chifukwa cha kuzunzidwa. Akupempha chithandizo chifukwa anthu amphamvu akuŵavula.

¹⁰Koma palibe wonena kuti, ‘Kodi ali kuti Mulungu, Mlengi wanga, amene amatithandiza ngakhale pakati pa mdima wa mavuto,

¹¹amenenso amatiphunzitsa kupambana nyama zam'dziko ndipo amatipatsa nzeru kupambana mbalame zouluka.’

¹²Ena amaitana Mulungu koma Iye saŵayankha, chifukwa cha kunyada ndi kuipa kwa anthuwo.

¹³Ndithudi, Mulungu saamva kupempha kopanda pake, Mphambe sasamalako zimenezo.

¹⁴“Inu aYobe, mukunena kuti simungathe kupenya Mulungu, komabe mlandu wanu adzauzenga ndiye, ndipo mukudikira kuti augamule.

¹⁵Ndiye tsono, popeza kuti ukali wake sukupereka chilango, ndipo akuchita ngati sasamalako kwambiri zochita zoipa za anthu,

¹⁶inu aYobe mumangolankhula zopandapake, mukungochulukitsa mau opanda nzeru.”