Read Buku Loyera - Chichewa Yob. 36 Bible Online

Yob. 36 - Buku Loyera - Chichewa bible

Yob. 36

¹Ndipo Elihu adapitirira kulankhula, nati:

²“Mundilole pang'ono, ndipo ndikuphunzitsani. Pakuti zilipobe zoti ndinene m'malo mwa Mulungu.

³Nzeru zanga zikhala zochokera patali, ndiwonetsa kulungama kwa Mlengi wanga.

⁴Ndithudi, sindikunena zabodza. Wolankhula nanune ndine wanzeru kotheratu.

⁵“Zoonadi, Mulungu ndi wamphamvu, sanyoza munthu aliyense, ndipo amadziŵa zonse.

⁶Salola oipa kuti akhalebe ndi moyo, koma anthu osauka amaŵachitira zolungama.

⁷Iyeyo amatchinjiriza anthu opanda chifukwa, amalola kuti alamulire ngati mafumu, ndipo motero amalemekezeka mpaka muyaya.

⁸Koma anthu akamangidwa ndi nsinga, namazunzika chifukwa cha zimene adachita,

⁹pamenepo Mulungu amaŵasonyeza ntchito zao ndi zolakwa zao, kutsutsa kudzikuza kwao kochita kunyanya.

¹⁰Amaŵatsekula makutu kuti amve malangizo ake, amaŵalamula kuti asiye zoipa.

¹¹Ngati anthu amumvera ndi kumamtumikira, adzatsiriza masiku a moyo wao mwamtendere, adzatsiriza zaka zao mosangalala.

¹²Koma akapanda kumvera, adzaonongeka ndi lupanga, adzafa osadziŵa kanthu.

¹³“Anthu onyoza Mulungu mumtima mwao amaputa mkwiyo wake, Mulungu akaŵalanga, iwo safuula kupempha chithandizo.

¹⁴Amafa akali biriŵiri, ndipo moyo wao umathera m'zonyansa.

¹⁵Koma Mulungu amapulumutsa ovutika mwa njira ya mazunzo ao omwe, amaŵatsekula makutu poŵagwetsa m'mavuto.

¹⁶Inuyo Mulungu adakutulutsaninso m'mavutowo, afuna kukuikani pabwino, osasoŵa kanthu kalikonse.

¹⁷“Koma tsopano inu mwapezeka opalamula ngati anthu oipa, choncho chilango cholungama cha Mulungu chakugwerani.

¹⁸Muchenjere kuti chuma chingakuphimbeni m'maso, musalole kuti chiphuphu chikusokezeni.

¹⁹Kodi kulira kwanu kungakuchotseni m'mavuto? Kodi mphamvu zanu zingakupulumutseni?

²⁰Musalakelake kuti usiku ubwere, chifukwa ndiyo nthaŵi imene mitundu ya anthu idzaonongeka.

²¹Muchenjere kuti musatembenukire ku uchimo, chifukwa uchimowu ndiwo udadzetsa kuzunzika kwanu.

²²Zoonadi, Mulungu ndi wamkulu ndiponso ndi wamphamvu. Kodi ndi mphunzitsi uti amene angafanane naye?

²³Palibe ndi mmodzi yemwe angauze Mulungu zoti achite. Palibe aliyense amene anganene kuti ‘Mulungu ndi wolakwa.’

²⁴“Kumbukirani kutamanda ntchito za Mulungu, zimene anthu amaziyamika ndi nyimbo.

²⁵Anthu onse amaona ntchitozo, koma palibe wozindikira m'mene ziliri.

²⁶Ndithudi, Mulungu ndi wamkulu kwambiri, sitimdziŵa mpang'ono pomwe. Chiŵerengero cha zaka zake nchosadziŵika.

²⁷Mulungu ndiye amakweza timadontho ta madzi ku thambo kuchokera pansi, ndipo amasungunula mitambo kuti ikhale mvula.

²⁸Mitambo imatsanyula mvulayo, ndipo mvulayo imavumba pa anthu mokwanira.

²⁹Kodi alipo wina woti angadziŵe kuyenda kwa mitambo kapena kugunda kwa zing'aning'ani?

³⁰Mulungu amaŵalitsa zing'aning'ani kuthambo kwake konse, zimafika ngakhale pansi pa nyanja.

³¹Mulungu amachenjeza mitundu ya anthu podzera m'zimenezi, komabe amapereka chakudya chochuluka.

³²Amagwira zing'aning'ani, ndipo amazilamula kuti zigwe pa malo amene Iye akufuna.

³³Kugunda kwake kumalengeza kuti Iye alipo, ndiye amalanga uchimo mwaukali.