Read Buku Loyera - Chichewa Yob. 37 Bible Online

Yob. 37 - Buku Loyera - Chichewa bible

Yob. 37

¹Nanenso ndimaopa zazikuluzi, mtima wanga umalumphalumpha kuchoka m'malo mwake.

²Mumvetsetse kulira kwa liwu la Mulungu, ndiye kuti kugunda kotuluka m'kamwa mwake.

³Amaponya ching'aning'ani pansi pa thambo, kuŵala kwake kumafika ku ngodya zonse za dziko lapansi.

⁴Pambuyo pake kugunda kwa Mulungu kumamveka, amagunda ndi liwu lake lalikulu pamene mphezi zikung'anipa.

⁵Mulungu amachita zodabwitsa ndi liwu lake. Amachita zazikulu zimene sitingathe kumvetsa.

⁶Amalamula chisanu chambee kuti chigwe pa dziko lapansi. Amalamulanso mvula kuti igwe mwamphamvu.

⁷Pamenepo Mulungu amalepheretsa anthu kugwira ntchito zao. Motero iwowo amazindikira kuti Iye mwini ali pa ntchito.

⁸Pomwepo zilombo zimathaŵira ku michembo yake, ndipo zimakabisalira m'ngaka zake.

⁹Kamvulumvulu amakuntha kuchokera ku malo ake, mphepo imadzetsa chisanu chambiri.

¹⁰Mpweya wa Mulungu umaunditsa chisanu, ndipo madzi am'nyanja amauma kuti gwa.

¹¹Mitambo yochindikira amaidzaza ndi madzi a mvula, ndipo amabalalitsa zing'aning'ani kuchokera m'mitambo.

¹²Mulungu amayendetsa mitambo mozungulirazungulira, kuti ichite zonse zimene Iye akufuna pa dziko lapansi.

¹³Mwina amagwetsa mvula pansi pano kuti ikhale chilango, mwina kuti aonetse chikondi kwa anthu, pothirira nthaka yao.

¹⁴“Inu aYobe, tamvani izi, imani, muganizire ntchito zodabwitsa za Mulungu.

¹⁵Kodi mukudziŵa m'mene Mulungu amazichitira, ndi m'mene amang'anipitsira mphezi m'mitambo yake?

¹⁶Kaya mukudziŵa m'mene Mulungu amayalira mitambo, ntchito yosonyeza nzeru zake zodabwitsa,

¹⁷paja inu zovala zanu mumamva kutentha kwambiri pamene mphepo yakumwera ikuwomba pa dziko?

¹⁸Kodi mungathe kufanafana naye Mulungu amene adatambasula thambo lili lolimba ngati chitsulo?

¹⁹“Chabwino, tiphunzitsenitu zoti tidzamuuze. Ifeyo sitingathe kunena kanthu poti mwa ife mwachita mdima.

²⁰Kodi nkofunikira kumdziŵitsa Mulungu kuti ndili naye ndi mau? Kodi kutero si kuchita ngati kupempha kuti ndiwonongeke?

²¹“Tsopano anthu sangathe kuyang'anitsitsa kuŵala, pamene kukunyezimira kwambiri mu mlengalenga, pamene mphepo yaomba nkuchotsa mitambo yonse.

²²Kuŵala kwake kumaonekera chakumpoto. Mulungu amaonetsa ulemerero woopsa.

²³Mphambe sitingathe kumufika pafupi, ndi woopsa pa ulamuliro ndi pa mphamvu. Ndi wolungamadi kwambiri, sangazunze anthu.

²⁴Nchifukwa chake anthu amamuwopa kwambiri. Iye sasamalako wina aliyense amene amadzinyenga kuti ndi wanzeru.” Chauta alankhula.