Read Buku Loyera - Chichewa Yob. 38 Bible Online

Yob. 38 - Buku Loyera - Chichewa bible

Yob. 38

¹Apo Chauta adayankha Yobe m'kamvulumvulu kuti,

²“Kodi ndiwe amene ukusokoneza uphungu wanga polankhula mau opanda nzeru?

³Onetsa chamuna, ndidzakufunsa, ndipo undiyankhe.

⁴“Kodi udaali kuti pamene ndinkaika maziko a dziko lapansi? Undiwuze ngati ndiwe womvetsa zinthu.

⁵Nanga kodi ukudziŵa amene adalemba malire ake, amene adayesapo ndi chingwe padzikopo?

⁶Kodi maziko ake adaŵakumba potani? Nanga mwala wake wapangodya adauika ndani?

⁷ Pa nthaŵiyo nyenyezi zakuvuma zinkaimba pamodzi, ndipo angelo onse a Mulungu ankafuula mokondwa?

⁸ “Kodi ndani amene adatsekera nyanja pamene inkalengedwa pamene inkachita ngati kutumphuka pansi pa dziko?

⁹Ndinetu amene ndidakuta nyanjayo ndi mitambo, ndidaiveka mdima ngati chovala.

¹⁰Ndidailembera malire, ndidaiikira mipiringidzo ndi zitseko zake.

¹¹Tsono ndidati, ‘Ufike mpaka apo osabzolapo, mafunde ako amphamvuwo aime pomwepo.’

¹²“Kodi chibadwire chako udalamulapo dzuŵa kuti lituluke m'maŵa, ndi kuti mbandakucha ukhalepo pa nthaŵi yake?

¹³Kodi iweyo udalamulapo kuti kuŵala kwa mbandakuchawo kuunikire dziko lonse lapansi, kuti kuthaŵitse anthu oipa obisala pamenepo?

¹⁴Chifukwa cha kuŵala kwa usana mapiri ndi zigwa zimaonekera bwino ngati makwinya a chovala ngati zilembo za chidindo pa mtapo.

¹⁵Kuŵala kwa dzuŵa sikuŵafika anthu oipa, choncho sangathe kugwira ntchito zao.

¹⁶“Kodi udakayendapo pansi penipeni pa nyanja ndi kukafika pa magwero ake?

¹⁷Kodi adakuwonetsa iwe zipata za imfa? Kodi udaonako ku dziko la anthu akufa kumene kuli mdima wokhawokha?

¹⁸Kodi kukula kwa dziko lapansi umakudziŵa? Undiwuze tsono ngati umazidziŵa zonsezi.

¹⁹“Kodi njira yopita kumene kumakhala kuŵala ili kuti? Nanga mdima, kwao nkuti?

²⁰Kodi iwe ungathe kuziperekeza kwaoko zimenezi, kodi ukuidziŵa njira yopita kwaoko?

²¹Makamaka ukudziŵadi ati, poti paja nthaŵi imeneyo nkuti iweyo utabadwa, ndipo zaka zako kuchuluka ati!

²²“Kodi udaloŵamo m'nyumba zosungiramo chisanu, kapena m'mene amasungira matalala?

²³Zimenezi ndazisungira nthaŵi ya mavuto, ndidzazitumiza nthaŵi yomenyana nkhondo.

²⁴Kodi udapitako kumene kumatulukira dzuŵa, kapena kumene kumachokera mphepo yakuvuma?

²⁵“Kodi ndani amene adakonza ngalande za mvula? Ndani adakonza njira zodzeramo mphezi?

²⁶Ndani amagwetsa mvula pa chipululu popanda anthu, ku dziko kumene sikukhala anthu.

²⁷Ndani amathirira dziko louma lagwaa, kotero kuti udzu umamerapo?

²⁸“Kodi mvula ili ndi bambo wake? Nanga madzi a mame adaŵabeleka ndani?

²⁹Kodi chisanu choundana adachibala ndani? Nanga adabereka chipale chochokera kumwamba ndani?

³⁰Ndani amasandutsa madzi kuti alimbe ngati mwala, pamene madzi apanyanja amazizira, nalimba kuti gwaa?

³¹ “Kodi Nsangwe iwe ungazimange maunyolo? Kodi zingwe za Akamwiniatsatana iwe ungathe kuzimasula?

³²Kodi ungathe kuwongolera nyenyezi pa nyengo yake? Kodi ungathe kutsogolera nyenyezi yaikulu ya Chimbalangondo pamodzi ndi tiana take?

³³Kodi malamulo a mlengalenga umaŵadziŵa? Nanga ulamuliro wake, kodi ungaukhazikitse pa dziko lapansi?

³⁴“Kodi iwe ungathe kulamula mitambo kuti igwetse mvula ya chigumula?

³⁵Kodi ungathe kutumiza zing'aning'ani kuti zing'anipe, ndi kugwera pa malo amene iwe ukufuna?

³⁶Ndani amene adayala mitambo bwino mu mlengalenga? Nanga ndani adalangiza mvula kuti igwere pakutipakuti?

³⁷Wanzeru ndani amene angathe kuŵerenga mitambo, nanga ndani angathe kupendeketsa mitsuko ya madzi akuthambo

³⁸amene amasandutsa fumbi matope, ndi kuumba zibumi?

³⁹“Kodi iwe ungathe kuufunira chakudya mkango? Kodi ungathe kuipatsa chakudya misona yake ija,

⁴⁰pamene ili khale m'mapanga mwake, kapena pamene ikubisala m'tchire?

⁴¹Kodi khwangwala amampatsa chakudya chake ndani, pamene maunda ake akulirira kwa Mulungu, namadzandira chifukwa chosoŵa chakudya?”