Read Buku Loyera - Chichewa Yob. 39 Bible Online

Yob. 39 - Buku Loyera - Chichewa bible

Yob. 39

¹“Kodi iwe umaidziŵa nthaŵi imene zinkhoma zimaswera? Kodi udaziwonapo nswala zikubadwa?

²Kodi ungathe kuŵerenga miyezi imene zimakhala ndi bele? Kodi nthaŵi imene nyamazi zimaswa iwe umaidziŵa?

³Kodi ukuidziŵa nthaŵi imene zidzakhala tsonga nkuswa ana, kenaka nkutayiza?

⁴Ana a nyamazi amakhala amphamvu, namakulira ku thengo. Pambuyo pake amapita, osabwereranso kwa mai wao.

⁵“Kodi abulu akuthengo adaŵapatsa ndani ufulu wongodziyendera? Ndani adaŵapatsa liŵilo lao?

⁶Ine ndidaŵapatsa chipululu kuti chikhale malo ao okhalako, ndiponso chichere kuti chikhale dera lao.

⁷Amakhala kutali ndi mizinda yaphokoso, ndipo sadziŵa mau okuwa a anthu oyendetsa nyama zakatundu.

⁸Kumapiri ndiko kumene kuli busa lao. Kumene amafunafuna msipu woti adye.

⁹“Kodi njati ingavomere kukutumikira? Kodi ingagone m'khola mwako usiku?

¹⁰Kodi ungathe kuimanga ndi nsinga kuti izilima? Kodi ingasalaze nthumbira m'munda mwako?

¹¹Kodi ungadalire njatiyo chifukwa cha mphamvu zake? Kodi ungayembekeze kuti ikugwirira ntchito yako?

¹²Kodi ungakhulupirire kuti idzabwera nkudzatuta tirigu wako ku malo opunthira?

¹³“Nthiŵatiŵa ikukupiza mapiko ake monyadira, koma nthenga zake ndi mapiko ake sizikuithandiza kuuluka monga amachitira kakoŵa.

¹⁴Nthiŵatiŵa imafotsera mazira ake pansi, kuti afundidwe m'nthaka.

¹⁵Koma imaiŵala kuti mapazi ake omwe angathe kuphwanya mazirawo, ndipo kuti nyama zakuthengo nkuŵapondereza.

¹⁶Nthiŵatiŵa imachita ana ake nkhalwe ngati si ake. Zakuti idaavutika poŵabereka imaiŵalako.

¹⁷Paja Mulungu adaimana nzeru, kotero kuti simvetsa kanthu kalikonse.

¹⁸Komabe nthiŵatiŵayo ikadzambatuka nkuyamba kuthaŵa, imamsiya kutali kavalo ndi wokwerapo wake.

¹⁹“Kodi ndiwe amene umapatsa mphamvu kavalo? Nanga ndiwe amene umaveka chenjerere m'khosi mwake?

²⁰Kodi ndiwe amene umamlumphitsa ngati dzombe? Kavalo akamadzuma, mpweya wake ndi waukali ndiponso woopsa.

²¹Kavaloyo amalumphalumpha m'chigwa, ndipo amapita ku nkhondo ndi mphamvu zake zonse.

²²Sachita mantha, sachita nkhaŵa, ndipo sabwerera m'mbuyo akaona lupanga.

²³Zida zankhondo za wokwerapo wake zimachita kwichikwichi m'phodo, ndipo mkondo ndi nthungo zimanyezemira pa dzuŵa.

²⁴Akavalowo amanjenjemera ndi ukali nathamangira kutsogolo, ndipo akangomva lipenga sangathe kuima.

²⁵Lipenga likalira amati, ‘Twee!’ Amamva fungo la nkhondo ali patali. Amamva kufuula kwa atsogoleri ankhondo.

²⁶“Kodi ndi nzeru zako zimene zimaphunzitsa kabaŵi kuuluka, ndi kutambalitsa mapiko ake kupita chakumwera?

²⁷Kodi umalamula chiwombankhanga ndiwe kuti chiziwuluka? Kodi udachiphunzitsa ndiwe kukamanga chisa pamwamba penipeni?

²⁸Chimakhala pa phiri, nkumanga chisa chake pamenepo, pansonga penipeni pa thanthwe losakwereka.

²⁹Pamenepo chimayang'ana choti chigwire kuti chidye, ndipo maso ake amachiwonera patali chinthucho.

³⁰Ana ake amayamwa magazi, amapezeka kumene kuli mitembo.” Kuyankha kwa Yobe.