Read Buku Loyera - Chichewa Yob. 4 Bible Online

Yob. 4 - Buku Loyera - Chichewa bible

Yob. 4

¹Tsono Elifazi wa ku Temani adati,

²“Iwe Yobe, kodi wina atakuyankha, ndiye kuti wakulakwira? Ah, koma ine ndekha sindingathe kukhala chete.

³Taona, iwe waphunzitsa anthu ambiri, walimbitsa mtima anthu ofooka.

⁴Mau ako adathandiza munthu wofuna kugwa, adachirikiza munthu wotha mphamvu.

⁵Koma tsopano mavuto akufikira iweyo, ndipo wataya mtima. Zakukhudza lero, ndipo ukuchita mantha.

⁶Unkalemekeza Mulungu, tsono uyenera kumdalira Iyeyo, Unkayenda m'njira yosalakwa, tsono uyenera kukhulupirira Mulungu.

⁷“Ganiza bwino tsopano: Kodi alipo munthu wosachimwa amene adaonongekapo nkale lonse? Nanga nkuti kumene udaona anthu olungama ataphedwa?

⁸Monga ndaonera ine, anthu amene amabzala tchimo namafesa mavuto, amakolola zomwezo.

⁹Monga momwe mphepo ya mkuntho imasakazira zinthu, Mulungu amaŵaononga ndi mkwiyo wake.

¹⁰Anthu oipa amakhuluma ngati mkango, koma Mulungu amaŵathyola mano.

¹¹Iwowo amafa ngati mikango yosoŵa nyama, ndipo misona yao imamwazikana.

¹²“Tsono mau adandifika monong'ona, khutu langa lidamva kunong'onako.

¹³ Zidandibwerera usiku m'masomphenya, nthaŵi imene anthu amagona tulo tofa nato.

¹⁴Ndidagwidwa ndi mantha, nkuyamba kunjenjemera, thupi langa lonse lidaweyeseka.

¹⁵Pamenepo mpweya wayaziyazi udandidutsa kumaso, ndipo ubweya wa pathupi panga udangoti njoo, kuimirira, chifukwa cha mantha.

¹⁶Chinthucho chidangoti chilili, koma ine osaŵazindikira maonekedwe ake. Patsogolo panga panali chinthu ndithu, kudangoti zii, kenaka ndidamva mau akuti:

¹⁷‘Kodi munthu angathe kukhala wolungama pamaso pa Mulungu? Kodi munthu angathe kukhala wangwiro pamaso pa Mlengi wake?

¹⁸Mulungu sakhulupirira ndi atumiki ake omwe, angelo ake omwe amaŵapeza cholakwa.

¹⁹Nanji munthu amene adachokera ku dothi, amene ali fumbi chabe, amene amathudzuka ngati kadziwotche.

²⁰M'maŵa ali moyo, madzulo nkufa munthuyo. Amapita ku manda, naiŵalika kotheratu.

²¹Zonse zimene ali nazo zimatha, ndipo amafa osadziŵa nkanthu komwe.’ ”