Read Buku Loyera - Chichewa Yob. 40 Bible Online

Yob. 40 - Buku Loyera - Chichewa bible

Yob. 40

¹Tsono Chauta adafunsa Yobe kuti,

²“Kodi munthu wamakaniwe ufuna kukangana ndi Mphambe? Chabwino, iwe amene unatsutsana ndi Mulungu uyankhe zimenezo.”

³Apo Yobe adayankha Chauta kuti,

⁴“Ine sindili kanthu konse! Kodi ndingathe kukuyankhani chiyani? Palibe, koma kungogwira pakamwa.

⁵Ndidalankhula kamodzi, sindiyankhanso. Ndidalankhula kaŵiri, sindiwonjezanso kanthu kena.” Mau a Chauta.

⁶Tsono Chauta adayankha Yobe m'kamvulumvulu kuti,

⁷“Tsopano vala dzilimbe ngati mphongo. Ndikufunsa mafunso, iweyo undiyankhe.

⁸Kodi ungandiyese ine wolakwa? Kodi ungandidzudzule kuti iweyo ukhale wolungama?

⁹Kodi uli ndi mphamvu monga Ine Mulungu? Kodi mau ako angagunde monga m'mene amagundira mau anga?

¹⁰“Ngati zili choncho udzipatse ufumu ndiponso ulemu. Uvale ulemerero wachifumu.

¹¹Tsanyula mkwiyo wako wosefukira, uyang'ane aliyense wodzikuza, ndipo umchepetse.

¹²Uyang'ane aliyense wodzikweza, ndipo umtsitse. Oipa onse uŵaponderezere pamalo pomwe aliripo.

¹³Onsewo uŵafwirise pamodzi m'chifwilimbwiti. Uŵakulunge kumaso m'dziko la anthu akufa.

¹⁴Ukatero, nanenso ndidzakuvomereza, kuti mphamvu zako zakupambanitsadi.

¹⁵“Taganiza za mvuu, Ine ndidaipanga monga momwe ndidapangira iwe. Imadya udzu ngati ng'ombe.

¹⁶Mphamvu zake ndi zazikulu kwambiri, thupi lake ndi lanyonga zedi.

¹⁷Imaimiritsa mchira wake kuti tototo, ngati mtengo wa mkungudza. Mitsempha ya ntchafu zake ndi yogwirana bwino.

¹⁸Mafupa ake ndi olimba ngati misiwe yamkuŵa, nthiti zake zili ngati mipiringidzo yachitsulo.

¹⁹“Mvuu ndiyo yaikulu mwa zolengedwa za Ine Mulungu. Ine amene ndidailenga ndidaipatsa maso ake oopsa aja.

²⁰Imapeza chakudya kumtunda kumene nyama zonse zakuthengo zimaseŵera.

²¹Imagona patsinde pa zitsamba za mipeta, imabisalika m'bango ndiponso pa thaŵale.

²²Zitsamba za mipeta ndizo zimaipatsa mthunzi. Misondodzi yamumtsinje imaiphimba.

²³Madzi amumtsinje akamakokoma, iyo sichita mantha. Ngakhale madzi a mu Yordani aiyese m'khosi, sitekeseka nazo.

²⁴Kodi nanga alipo wina amene angathe kukola mvuu ndi mbedza kapena kuikola mu msampha?