Read Buku Loyera - Chichewa Yob. 41 Bible Online

Yob. 41 - Buku Loyera - Chichewa bible

Yob. 41

¹ Kodi ungathe kuchikoka ndi mbedza ya nsomba chilombo chija cha Leviyatani, kapena kukanikiza lilime lake pansi ndi chingwe?

²Kodi ungathe kuchimanga chingwe m'mphuno mwake, kapena kuchiboola nsagwada ndi mbedza?

³Kodi chidzakupempha kuti uchimasule? Kodi chidzakupemba kuti uchichitire chifundo?

⁴Kodi chidzachita nawe chipangano kuti chikhale chokutumikira mpaka muyaya?

⁵Kodi ungaseŵere nacho ngati mbalame? Kodi kapena nkuchimanga ndi unyolo kuti adzakazi ako aseŵere nacho?

⁶Kodi asodzi nkuchitsatsa malonda? Nanga amalondawo nkugaŵanagaŵana nyama yake kuti akaigulitse?

⁷Kodi chikopa chake ungathe kuchilasa ndi ntcheto, kapena kuboola mutu wake ndi nthungo zophera nsomba?

⁸Ukachiputa, udziŵe kuti pali nkhondo, ndipo iweyo sudzabwereranso.

⁹Ndithu, aliyense akachiwona chilombocho, amataya mtima, ndipo amangodzigwera ndi mantha.

¹⁰Ngati palibe wina woti angalimbe mtima nkuchiputa. Nanga ndani angalimbe mtima nkukangana ndi Ine Mulungu?

¹¹Kodi ndani adandipatsa kanthu, kuti Ineyo ndimbwezere? Zonse za pansi pa thambo ndi zanga.

¹²“Sindingaleke kulankhula za ziwalo zake za chilombocho, za mphamvu zake ngakhalenso za maonekedwe a thupi lake.

¹³Ndani angasende chikopa chake? Ndani angachibaye chikopa chimene chija, kulimba konse kuja ngati chovala chachitsulo?

¹⁴Ndani angatsekule kukamwa kwake? Mano ake ndi oopsa.

¹⁵Kumsana kwake kuli mizere ya mamba onga zishango zolumikizanalumikizana, onse olimba ngati mwala.

¹⁶Mambawo ndi olukanalukana, kotero kuti ndi mpweya womwe sungathe kuloŵa pakati pake.

¹⁷Ndi olumikizanalumikizana, ndi omamatirana kwambiri, kotero kuti sangathe kutayana.

¹⁸Kuyetsemula kwake kumatulutsa mbaliwali, maso ake amaŵala ngati kuŵala kwa mbandakucha.

¹⁹M'kamwa mwake mumatuluka nsakali za moto, mumathetheka mbaliwali za moto.

²⁰M'mphuno mwake mumatuluka utsi, ngati wa m'nkhali yogaduka ndiponso ngati wa moto wa mlulu.

²¹Mpweya wake umayatsa makala, malaŵi a moto amatuluka m'kamwa mwake.

²²Khosi lake ndi lamphamvu kwambiri, aliyense wokumana nacho amangoti njenjenje ndi mantha.

²³Minyewa ya thupi lake ndi yolumikizana, ndi yokhwima kwambiri, ndipo ndi yolimba.

²⁴Pachifuwa pake mpouma ngati mwala. Pali gwa! Ngati mwala wa mphero.

²⁵Chilombocho chikangoti vuuku, ndi amphamvu omwe amaopa. Akamva phokoso lake, amachita mantha.

²⁶Ngakhale lupanga lichikanthe, silichichita kanthu. Mkondo, muvi ndi nthungo, zonse zimalephera.

²⁷Chitsulo chimachiyesa phesi chabe, mkuŵa chimauyesa chikuni choola.

²⁸Muvi sungathe kuchithaŵitsa, Miyala imene achilasa nayo, chimangoinyenyanyenya.

²⁹Zibonga zimakhala ngati ziputu. Akamachitchaya ndi nthungo, icho chimangoseka.

³⁰Za kumimba kwake zili ngati mapale akuthwa. Chimatambalala m'matope ngati galeta lopunthira tirigu.

³¹Chimagadutsa madzi ozama ngati madzi am'nkhali, chimasandutsa nyanja kuti igaduke ngati mbiya yoyengeramo mafuta.

³²Kumbuyo kwake chimasiya nthubwitubwi zambee, kotero kuti munthu angaganize kuti nyanja yachita imvi.

³³Pa dziko lapansi palibe china chofanana nacho, ncholengedwa chopanda mantha.

³⁴Chimanyoza nyama zina zonse. Icho chija ndi mfumu ya nyama zonse.” Mau omaliza a Yobe.