Read Buku Loyera - Chichewa Yob. 5 Bible Online

Yob. 5 - Buku Loyera - Chichewa bible

Yob. 5

¹“Iwe Yobe, itana tsono. Kodi alipo wina aliyense adzakuyankhe? Kodi ndi kwa mngelo uti ungapeze thandizo?

²Pajatu mkwiyo umapha chitsiru, ndipo njiru zimaononga wopusa.

³Ine ndidaona chitsiru chitamera mizu, koma mwadzidzidzi nyumba yake ndidaitemberera.

⁴Ana ake alibe nchitetezo chomwe, amaŵapondereza m'bwalo lamilandu, palibe wina aliyense woŵapulumutsa.

⁵Anthu anjala amamdyera zokolola zake, amamtengera ndi zapaminga zomwe. Anthu akhwinthi amafunkha chuma chake.

⁶Masautso satuluka m'fumbi, ndipo zovuta sizichokera m'dothi ai.

⁷Koma chibadwire munthu amangodzitengera mavuto yekha mosalephera, monga momwe sizilepherera mbaliwali kuulukira ku mlengalenga, kuchokera pa moto.

⁸“Achikhala ndinali ine, ndikadatembenukira kwa Mulungu, ndikadapereka mlandu wanga kwa Iye.

⁹ Ntchito zake ndi zazikulu ndi zosamvetseka. Zodabwitsa zimene amachita ndi zosaŵerengeka.

¹⁰Amagwetsa mvula pa dziko lapansi, ndipo amathirira minda ya anthu.

¹¹Amakweza anthu oluluka, ndipo amasangalatsa anthu olira.

¹²Amalepheretsa chiwembu cha anthu ochenjera, kotero kuti cholinga chao sichiphula kanthu.

¹³Amakola anthu ochenjera mu msampha wa kuchenjera kwao, amathetsa msanga zimene akapsala adakonza kuti achite.

¹⁴Iwowo amakumana ndi mdima ngakhale masana, amayambasa masanasana ngati usiku.

¹⁵Koma Mulungu amateteza amphaŵi kwa adani oŵasinjirira, amapulumutsa osauka kwa anthu ofuna kuŵapanikiza.

¹⁶Choncho amphaŵi amaŵalimbitsa mtima, koma anthu oipa amaŵatseka pakamwa.

¹⁷ “Ndi wodala munthu amene Mulungu amamdzudzula. Nchifukwa chake usamanyoze chilango cha Mphambe.

¹⁸ Pakuti ndiye amene amavulaza namangaponso mabala. Amakantha, komanso manja ake amachiritsa.

¹⁹Iye adzakupulumutsa ku masautso nthaŵi ndi nthaŵi. Zovuta sizidzakukhudza konse, zingachuluke bwanji.

²⁰Pa nthaŵi ya njala adzakusamala, pa nthaŵi ya nkhondo adzakupulumutsa.

²¹Adzakuteteza kwa anthu osinjirira, chiwonongeko chikadzafika, sudzachiwopa.

²²Pa nthaŵi ya chiwonongeko ndi ya njala uzidzaseka, zilombo zakuthengo sudzaziwopa.

²³M'minda mwako simudzakhala miyala, nyama zakuthengo sizizakuvuta.

²⁴Udzadziŵa kuti nyumba yako ndi malo amtendere, udzaona kuti pa zoŵeta zako palibe chosoŵa.

²⁵Udzadziŵa kuti ana ako adzakhala ambiri, ndipo kuti zidzukulu zako zidzachuluka ngati udzu.

²⁶Udzafika ku manda utakalamba, monga m'mene zokolola zimachera pa nyengo yake.

²⁷Iwe Yobe, zonsezi ife tazifufuzafufuza, ndipo taona kuti ndi zoona. Uzimvere ndi kuzitsata zimenezi.”