Read Buku Loyera - Chichewa Yob. 6 Bible Online

Yob. 6 - Buku Loyera - Chichewa bible

Yob. 6

¹Tsono Yobe adayankha kuti,

²“Achikhala mavuto anga adaayesedwa, achikhala masoka anga adaaŵaika pa sikelo,

³bwenzi atalemera kupambana mchenga wonse wam'nyanja. Nchifukwa chake kulankhula kwanga kuli kokadzulira.

⁴Zoonadi mivi yake ya Mphambe yandibaya, thupi langa likumva ululu wa miviyo. Zoopsa za Mulungu zandizinga, kuti zilimbane nane.

⁵Kodi bulu amalira akakhala ndi msipu? Nanga ng'ombe, kodi imalira ikakhala ndi chakudya?

⁶Kodi chakudya nkuchidya chili zii, chopanda mchere? Kodi choyera cha dzira chimatsekemera?

⁷Zakudya zimenezi sindifuna nkuzilaŵa komwe, zakudya zake ndi zobwerera kukhosi.

⁸“Achikhala ndidaalandira chomwe ndikufuna, achikhala Mulungu adaandipatsa chimene ndikukhumba!

⁹Achikhala kudaamkomera Mulungu kuti anditswanye, achikhala adaandimenya ndi dzanja lake, nkundiwonongeratu!

¹⁰Zimenezi zikadandisangalatsa, ndikadakondwa nazo kwambiri ngakhale zipweteke chotani, podziŵa kuti sindidakane mau a Woyera uja.

¹¹Kodi mphamvu zanga ndi zotani kuti ndizikhalabe ndi moyo? Nanga moyo wanga ukupitiriranji, ngati chiyembekezo palibe?

¹²Kodi ine ndidachita kuti gwa ngati mwala? Kodi thupi langa ndi lolimba ngati chitsulo?

¹³Zoona, ndilibenso mphamvu zodzipulumutsira, kulibenso kwina koti nkupezerako chithandizo.

¹⁴“Pa mavuto ngati ameneŵa pafunika abwenzi okhulupirika, kuwopa kuti mwina mwake munthu angasiyane ndi Mphambe.

¹⁵Koma abwenzi anga ndi onyenga, ngati mtsinje wothamanga, ngati mitsinje youma msanga mvula ikasoŵa.

¹⁶Ali ngati mitsinje ya madzi abii nthaŵi ya dzinja, imene madzi ake amakhala ambiri chifukwa cha kuchuluka kwa mvula.

¹⁷Koma pa nthaŵi ya mafundi imauma, kukatentha imamwerera.

¹⁸Anthu apaulendo amapatukirako kufuna madzi, koma amangoyendayenda nkufera m'chipululu.

¹⁹Oyenda pa ngamira a ku Tema amaifunafuna mitsinjeyo. Alendo a ku Sheba amaidalira.

²⁰Amataya mtima chifukwa ankayembekeza kupeza madzi, koma pofika kumeneko, angoti kakasi, poti idauma.

²¹“Tsono umu ndimo m'mene inuyo mwandichitira ine. Mwaona tsoka langa, ndipo mukuchita mantha.

²²Kodi ndanena kuti, ‘Mundipatse mphatso,’ kapena kuti, ‘Mupereke chiphuphu kwa wina chifukwa cha ine?’

²³Kodi ndanena kuti, ‘Mundipulumutse kwa mdani,’ kapena kuti, ‘Mundiwombole kwa ondizunza?’

²⁴“Chabwino, langizeni ndipo ndidzakhala chete. Dziŵitseni m'mene ndidachimwira.

²⁵Mau oona amalasa mtima, koma inu mukunditsutsa pa zotani?

²⁶Kodi inu mukufuna kundidzudzuliranji? Monga simukuwona kuti mau a munthu wotaya mtima ndi mphepo chabe?

²⁷Zoonadi inu mumapondereza ana amasiye, ndi kuŵaika pa malonda abwenzi anu omwe.

²⁸“Tsono mundiyang'anitsitse bwino! Sindikulankhula zabodza pamaso panu.

²⁹Chonde, feŵani mtima, musachite zosalungama. Musandiimbe mlandu, poti ndine wolungama.

³⁰Kodi mukuganiza kuti ndikulankhula zabodza? Monga ine sindingasiyanitse chabwino ndi choipa?”