Read Buku Loyera - Chichewa Yob. 7 Bible Online

Yob. 7 - Buku Loyera - Chichewa bible

Yob. 7

¹“Moyo wa munthu pa dziko lapansi ndi wa ntchito yakalavulagaga. Masiku ake ali ngati a munthu waganyu.

²Paja kapolo amalakalaka mthunzi, wantchito amayembekezera malipiro ake,

³ndiye inenso ndimangovutika nthaŵi zonse. Ngakhale usiku ndimapezabe mavuto.

⁴Ndikamagona ndimafunsa kuti, ‘Kodi kucha liti?’ Koma usiku ndi wautali, sindigona tulo, ndimangoti sadabusadabu mpaka mbandakucha.

⁵Thupi langa ladzaza mphutsi ndi zonyansa. Khungu langa lang'ambika, ndipo likudza mafinya.

⁶Masiku anga ndi othamanga kupambana makina oombera nsalu, amatha opanda chikhulupiriro chilichonse.

⁷“Inu Mulungu kumbukirani kuti moyo wanga uli ngati mpweya. Masiku abwino sindidzaŵaonanso.

⁸Amene akundiwona tsopano, sadzandiwonanso. Nthaŵi yomwe iye adzandifunafuna, ine ndidzakhala nditapita.

⁹ Monga mtambo umazimirira ndi kukanganuka, momwemonso munthu woloŵa ku manda sabwerako.

¹⁰Sabweranso kunyumba kwake, ndipo onse omdziŵa amamuiŵala.

¹¹“Nchifukwa chake sindidzatseka pakamwa. Ndiyenera kulankhula, chifukwa kukhosi kwanga kuli nthumanzi. Ndiyenera kudandaula, chifukwa mumtima mwanga muli zoŵaŵa.

¹²Kodi ine ndine nyanja, kapena chilombo cham'nyanja, kuti inu mundiikire alonda?

¹³Ndikagona pansi kuti ndithuze mtima, ndi kupeza mpumulo pabedi panga,

¹⁴inu mumandichititsa mantha ndi maloto, mumandiwopsa ndi zinthu zondiwonekera m'masomphenya.

¹⁵Choncho ndikadasankha kudzikhweza kapena kufa kumene, kupambana kupirira zovuta zimene ndikuzimva m'thupi mwanga.

¹⁶Ndatopa nawo moyo wanga, sindingakonde kukhala moyo nthaŵi zonse. Ingondisiyani, poti moyo wanga uli ngati mpweya chabe.

¹⁷ Inu Mulungu, kodi munthu nchiyani, kuti muzimganizira chotere, kuti muzisamala zochita zake?

¹⁸Mumampenyetsetsa masiku onse, ndipo mumamuyesa nthaŵi zonse.

¹⁹Kodi mudzaleka liti kumandizonda, kuti ndingopezako mpata womeza malovu?

²⁰Kodi ndikachimwa, ndimakuvutani bwanji, Inu Wopenyetsetsa anthu? Chifukwa chiyani mwandiika kuti ndikhale ngati choponyerapo chandamale chanu? Chifukwa chiyani ndikukhala ngati katundu wolemera kwa Inu?

²¹Chifukwa chiyani simukundikhululukira machimo anga ndi kundichotsera zolakwa zanga? Nthaŵi yoti ndiloŵe m'manda ili pafupi. Inu mudzandifunafuna, koma simudzandiwonanso.” Bilidadi.