Read Buku Loyera - Chichewa Yob. 9 Bible Online

Yob. 9 - Buku Loyera - Chichewa bible

Yob. 9

¹Tsono Yobe adayankha kuti,

²“Inde, ndikudziŵa kuti zimenezi ndi zoona, koma nanga munthu angathe bwanji kukhala wolungama pamaso pa Mulungu?

³Kodi wina aliyense angathe kutsutsana ndi Mulungu? Ai sangathe kutsutsana naye, chifukwa Mulungu ali ndi mafunso ambiri osayankhika.

⁴Mulungu ndi wanzeru, ndipo ndi wamphamvu kwambiri. Palibe munthu amene angathe kulimbana naye, popanda kupwetekerapo.

⁵Iyeyo amasendeza mapiri, iwo osadziŵako, amaŵagubuduza ali wokwiya.

⁶Ndiye amene amagwedeza dziko lapansi ndi zivomezi, ndipo mizati yake imanjenjemera.

⁷ Ndiye amene angalamule dzuŵa kuti lisatuluke m'maŵa, ndi kuletsa nyenyezi kuti zisaŵale usiku.

⁸Ndi Mulungu yekha amene adayala zakuthambo, ndiye amayenda pa mafunde apanyanja.

⁹ Ndiye amene adalenga nyenyezi za Mlalang'amba ndi Akamwiniatsatana, Nsangwe ndi Kumpotosimpita.

¹⁰Ndiye amene amachita zazikulu zosamvetseka, ndiye amene amachita zodabwitsa zosaŵerengeka.

¹¹Ndithu Mulungu akapita pafupi ndi ine, sindimuwona konse. Akandidutsa, ine sindimpenya.

¹²Akamalanda zinthu, ndani angathe kumletsa? Ndani angathe kumufunsa kuti, ‘Mukuchita chiyani?’

¹³“Mulungu sabweza ukali wake, adaononga adani ake othandizana ndi Rahabu, chilombo choipa chija.

¹⁴Nanga ineyo ndingathe kumuyankha bwanji? Mau okangana naye ndingaŵapeze kuti?

¹⁵Ngakhale ndine wosachimwa, sindingathe kumuyankha Mulungu. Ndiyenera kungopempha chifundo kwa Iye amene akundizenga mlandu.

¹⁶Ngakhale ndikadamuitana, Iye nkuvomera, sindikhulupirira kuti akadamvadi mau angawo.

¹⁷Paja amandikantha ndi mavuto onga mphepo yamkuntho, amandipweteka ndi mabala ambiri, popanda nchifukwa chomwe.

¹⁸Mulungu sandilola kuti ndipume, koma amandichulukitsirachulukitsira zoŵaŵa.

¹⁹Kodi ine nkulimbana ndi Mulungu, mphamvu zonse zija? Kodi ine nkutsutsana ndi Mulungu pa bwalo la milandu? Ndani angamuzenge mlandu?

²⁰Ngakhale ndine wosalakwa, komabe zolankhula zanga zikhoza kunditsutsa. Ngakhale ndine wopanda cholakwa, akadandipezabe kuti ndine wolakwa.

²¹Ine ndiye ndilibe mlandu, koma sindidziyenereza, moyo wanga ndimaunyoza.

²²Palibe chabwino ai. Nchifukwa chake ndikuti, Mulungu amaononga anthu oipa ndi anthu abwino omwe.

²³Pamene munthu wosachimwa afa mwadzidzidzi, Mulungu amangoseka tsoka la munthu wosachimwayo.

²⁴Mulungu akapereka dziko m'manja mwa anthu oipa, amaŵatseka maso anthu oweruza dzikolo. Ngati si Iyeyo wachita zimenezi, nanga nkukhala yani?

²⁵“Masiku anga ndi othamanga kwambiri kupambana munthu waliŵiro. Masikuwo amapita, ine osaona zabwino.

²⁶Amayenda ngati zombo zaliŵiro zapanyanja, ngati mphungu yogudukira nyama yoti idye.

²⁷Mwina ndinganene kuti, ‘Ndidzaiŵala madandaulo anga, nkhope yanga sidzakhalanso yachisoni, ndipo ndidzasangalala.’

²⁸Koma ndimaopabe kuti mavuto anga onse adzabwereranso pa ine, pakuti ndikudziŵa kuti Mulungu sadzavomereza kuti ine ndine wosalakwa.

²⁹Ngati ndine wolakwa ndithu, chabwinotu, zagwa zatha!

³⁰Ngakhale ndisambe thupi lonse ndi madzi oyera kwambiri, ndi kusamba m'manja ndi sopo,

³¹Mulungu adzandiponyabe pa dzala, ndipo zovala zanga zomwe zidzachita nane nyansi.

³²Zoona, Mulungu si munthu ngati ine, kuti ndingakangane naye, sindingathe kutsutsana naye pa mlandu.

³³Palibe mkhalapakati woti nkutiweruza aŵirife, woti nkugamula mlandu pakati pa Mulungu ndi ine.

³⁴Mulungu asandilange ndi ndodo yake, kuwopa Iye kusandidetse nkhaŵa.

³⁵Motero ndidakatha kulankhula osamuwopa, koma monga zilirimu, sindingathe konse.”