Read Buku Loyera - Chichewa Mas. 102 Bible Online

Mas. 102 - Buku Loyera - Chichewa bible

Mas. 102

¹Pemphero la munthu wapamavuto wodandaula kwa Chauta. Inu Chauta, imvani pemphero langa, kulira kwanga kufike kwa Inu.

²Musandibisire nkhope yanu pa tsiku la mavuto anga. Tcherani khutu kuti mundimve, mundiyankhe msanga pa tsiku limene ndikukuitanani.

³Masiku anga amangopita ngati utsi, ndipo thupi langa likuyaka ngati ng'anjo.

⁴Mtima wanga wakanthidwa, ndipo wafota ngati udzu, zoonadi, ngakhale chakudya chimandinyansa.

⁵Ndaonderatu ngati munthu wachitopa, ntchito yanga ndi kubuula nthaŵi zonse.

⁶Ndili ngati mbalame yakuchipululu, ngati kadzidzi wam'mabwinja.

⁷Ndimagona osapeza tulo, ndili ngati mbalame yokhala yokha pa denga,

⁸Tsiku lonse adani anga amandichita chipongwe, onse ondinyoza amatchula dzina langa potemberera.

⁹Inetu ndimadya phulusa ngati chakudya, chakumwa changa ndimasakaniza ndi misozi,

¹⁰chifukwa cha ukali wanu ndi mkwiyo wanu, popeza kuti Inu mwandinyamula ndi kunditaya.

¹¹Masiku anga ali pafupi kutha ngati mthunzi wamadzulo. Ndikufota ngati udzu.

¹²Koma Inu Chauta, mumakhala pa mpando wanu waufumu mpaka muyaya. Anthu a mibadwo yonse adzakukumbukirani.

¹³Mudzadzuka nkuchitira chifundo mzinda wa Ziyoni, zoonadi, nthaŵi yake youkomera mtima yafika.

¹⁴Mzindawo amaukondabetu anthu anu, ngakhale waonongeka ndi kusanduka bwinja.

¹⁵Mitundu ya anthu idzalemekeza Chauta moopa, mafumu onse a pa dziko lapansi adzaopa ulemerero wake.

¹⁶Chauta adzamanganso Ziyoni, ndipo adzaonekera mu ulemerero wake.

¹⁷Adzayankha pemphero la anthu ake otayika, sadzanyoza kupemba kwao.

¹⁸Zimenezi zilembedwe chifukwa cha mbadwo wakutsogolo, kuti anthu amene mpaka tsopano lino sanabadwebe, nawonso adzatamande Chauta,

¹⁹Iye adayang'ana pansi ali m'malo ake oyera kumwamba, ali kumwambako, Chauta adayang'ana pa dziko lapansi,

²⁰kuti amve kubuula kwa anthu am'ndende, kuti aŵapulumutse amene adaayenera kuphedwa.

²¹Motero anthu adzalalika dzina la Chauta ku Ziyoni, ndipo adzamtamanda ku Yerusalemu,

²²pamene mitundu ya anthu ndi mafumu adzasonkhana kuti apembedze Chauta.

²³Chauta wathyola mphamvu zanga ndisanakule, wafupikitsa masiku anga.

²⁴Ndikuti, “Mulungu wanga, musandichotse tsopano ndisanakalambe, Inu amene zaka zanu sizitha mpaka muyaya.”

²⁵ Inu mudaika maziko a dziko lapansi kalekale, ndipo zakumwamba mudazipanga ndi manja anu.

²⁶Zonsezi zidzatha ngati malaya, koma Inu mulipobe. Inu mumazisintha ngati chovala, ndipo zimatha.

²⁷Koma Inu simusintha, zaka zanu sizitha.

²⁸Ana a ife atumiki anu adzakhala opanda nkhaŵa, zidzukulu zathu zidzakhazikika pamaso panu.