Read Buku Loyera - Chichewa Mas. 105 Bible Online

Mas. 105 - Buku Loyera - Chichewa bible

Mas. 105

¹Thokozani Chauta, tamandani dzina lake, lalikani za ntchito zake pakati pa mitundu ya anthu.

²Imbirani Chauta, muimbireni nyimbo zomtamanda, lalikani za ntchito zake zodabwitsa.

³Munyadire dzina lake loyera. Ikondwe mitima ya anthu amene amapembedza Chauta.

⁴Muzidalira Chauta ndi mphamvu zake. Muziyesetsa kukhala pamaso pake kosalekeza.

⁵Inu zidzukulu za Abrahamu mtumiki wake, ana a Yakobe, osankhidwa ake,

⁶musaiŵale ntchito zodabwitsa ndi zozizwitsa zimene ankazichita, ndiponso m'mene ankaweruzira anthu.

⁷Iye ndiye Chauta, Mulungu wathu, amalamulira dziko lonse lapansi.

⁸Amasunga chipangano chake nthaŵi zonse, sangaiŵale lamulo limene adalipereka ku mibadwo yonse.

⁹ Amasunga chipangano chimene adachita ndi Abrahamu, lonjezo lake limene adapatsa Isaki molumbira.

¹⁰ Lonjezolo adabwerezanso kwa Yakobe kuti likhale chipangano chokhazikika mu Israele mpaka muyaya.

¹¹Adati, “Ndidzakupatsa dziko la Kanani kuti likhale choloŵa chako chokhalira iweyo.”

¹²Pamene anali anthu oŵerengeka, anthu osatchuka, ongokhala nawo m'dzikomo,

¹³omangoyendayenda kuchokera ku mtundu wina wa anthu kupita ku mtundu wina, kuchokera ku ufumu wina kupita ku ufumu wina,

¹⁴ sadalole ndi mmodzi yemwe kuti aŵapsinje, adalanga mafumu ena chifukwa cha anthu akewo.

¹⁵Adati, “Musakhudze odzozedwa anga, musaŵachite choipa aneneri anga.”

¹⁶ Pamene Chauta adadzetsa njala m'dziko la Kanani ndi kuwononga chakudya chonse,

¹⁷ Iye anali atatuma munthu patsogolo pa anthu ake, Yosefe uja amene adagulitsidwa ngati kapolo.

¹⁸ Mapazi ake adapwetekedwa ndi matangadza, khosi lake lidavekedwa unyolo,

¹⁹mpaka zimene Yosefe adanena zija zidachitikadi. Mau a Chauta adatsimikiza kuti iye sadalakwe.

²⁰Motero mfumu idalamula kuti akammasule, wolamulira mitundu ya anthuyo adammasuladi.

²¹ Adamsandutsa mbuye wa nyumba yake, ndi wolamulira chuma chake chonse,

²²kuti azilangiza nduna zake monga momwe ankafunira, ndi kuŵaphunzitsa nzeru akuluakulu.

²³ Tsono Israele adafika ku Ejipito. Yakobeyo adakhala nawo m'dziko la Hamu.

²⁴ Chauta adalola kuti anthu ake achuluke, naŵasandutsa amphamvu kupambana adani ao.

²⁵Adaumitsa mitima ya adaniwo kuti adane ndi anthu ake ndi kuŵapanganirana zaupandu.

²⁶ Kenaka adatuma Mose mtumiki wake pamodzi ndi Aroni amene adamsankha.

²⁷Iwo adachita zizindikiro m'dzina lake pakati pa anthuwo, adachita ntchito zozizwitsa m'dziko la Hamu.

²⁸ Chauta adatumiza mdima, nasandutsa dzikolo kuti likhale lamdima. Komabe anthuwo adakaniratu mau a Chauta.

²⁹ Iye adasandutsa madzi ao kukhala magazi, ndipo nsomba zao zidafa.

³⁰ Dziko lao lidadzaza ndi achule, ngakhale m'zipinda za mafumu zomwe.

³¹ Adalankhula, ndipo kudatuluka ntchentche zochuluka, mtundu wa udzudzu udaloŵa m'dziko mwao monse.

³² Adaŵagwetsera matalala m'malo mwa mvula, adaŵagwetsera ching'aning'ani chimene chinkang'anima m'dziko mwao monse.

³³Adagwetsa mipesa yao ndi mikuyu yao, adathyola mitengo yonse ya m'dziko mwao.

³⁴ Adalankhula, ndipo kudafika dzombe ndi mandowa osaŵerengeka,

³⁵amene adaononga zomera zonse za m'dziko mwao, nadya zipatso zonse za m'minda mwao.

³⁶ Iye adapha ana onse achisamba m'dziko mwao, ana onse oyamba, oŵabala akadali abiriŵiri.

³⁷ Kenaka Chauta adaŵatulutsa Aisraele atatenga siliva ndi golide, pakati pa mafuko awo panalibe amene adafooka.

³⁸Aejipito adasangalala pamene iwo adapita, chifukwa ankachita nawo mantha anthuwo.

³⁹ Chauta adaika mtambo kuti uziphimba anthu ake, adaika moto kuti uziŵaunikira usiku.

⁴⁰ Iwo adapempha chakudya, ndipo Chauta adatumiza zinziri, adaŵapatsa buledi wambiri wochokera kumwamba.

⁴¹ Adatsekula thanthwe, madzi nkutumphuka. Madziwo adayenda m'chipululu ngati mtsinje.

⁴²Monsemo ankakumbukira lonjezo lake loyera limene adaachitira Abrahamu mtumiki wake.

⁴³Motero Chauta adaŵatulutsa anthu ake, osankhidwa akewo adatuluka ndi chimwemwe akuimba.

⁴⁴ Adaŵapatsa maiko a mitundu ina ya anthu, adalanda minda ya anthu ena kuti ikhale yao.

⁴⁵Potero Chauta adafuna kuti anthu ake azisunga malangizo ndi kumatsata malamulo ake onse. Tamandani Chauta!