Read Buku Loyera - Chichewa Mas. 107 Bible Online

Mas. 107 - Buku Loyera - Chichewa bible

Mas. 107

¹ Thokozani Chauta chifukwa ngwabwino, pakuti chikondi chake nchamuyaya.

²Anenedi choncho oomboledwa a Chauta, amene Iye waŵapulumutsa ku mavuto.

³Waŵasonkhanitsa kuchokera ku maiko onse, kuchokera kuvuma ndi kuzambwe, kumpoto ndi kumwera.

⁴Ena adasokera m'chipululu, osapeza njira yopita ku mzinda woti akakhalemo.

⁵Adamva njala ndi ludzu, moyo wao unkafookeratu.

⁶Tsono anthu aja adalira kwa Chauta pamene anali m'mavuto amenewo, ndipo Chauta adaŵapulumutsa.

⁷Adaŵatsogolera pa njira yolunjika mpaka anthuwo adakafika ku mzinda woti akakhalemo uja.

⁸Athokoze Chauta chifukwa cha chikondi chake chosasinthika, chifukwa cha ntchito zake zodabwitsa kwa anthu onse.

⁹Chauta amapha ludzu la munthu womva ludzu, amamudyetsa zinthu zabwino munthu womva njala.

¹⁰Ena adakhala mu mdima ali ndi chisoni, anali am'ndende ozunzika m'maunyolo achitsulo,

¹¹pakuti adaatsutsa mau a Mulungu, adaakana monyoza malangizo a Wopambanazonse.

¹²Iye adaŵapsinja ndi ntchito yakalavulagaga, motero iwo adagwa pansi, popanda mmodzi woŵathandiza.

¹³Tsono anthu aja adalira kwa Chauta pamene anali m'mavuto amenewo, ndipo Chauta adaŵapulumutsa ku mavuto aowo.

¹⁴Chauta adaŵatulutsa anthuwo mu mdima ndi m'chisoni muja, ndipo adadula maunyolo ao.

¹⁵Athokoze Chauta chifukwa cha chikondi chake chosasinthika, chifukwa cha ntchito zake zodabwitsa kwa anthu onse.

¹⁶Pajatu adathyola zitseko zamkuŵa, nadula paŵiri mipiringidzo yachitsulo.

¹⁷Ena adadwala chifukwa cha njira zao zoipa, nazunzika chifukwa cha machimo ao.

¹⁸Sankafuna chakudya cha mtundu uliwonse, ndipo adayandikira ku zipata za imfa.

¹⁹Tsono anthu aja adalira kwa Chauta pamene anali m'mavuto amenewo, ndipo Chauta adaŵapulumutsa ku mavuto aowo.

²⁰Chauta adatumiza mau ake, naŵachiritsa anthuwo, adaŵapulumutsa kuti asaonongeke.

²¹Athokoze Chauta chifukwa cha chikondi chake chosasinthika, chifukwa cha ntchito zake zodabwitsa kwa anthu onse.

²²Apereke nsembe zothokozera, ndi kulalika ntchito za Chauta, poimba nyimbo zachimwemwe.

²³Ena adakayenda ku nyanja m'zombo, namachita malonda pa Nyanja yaikulu.

²⁴Adaona ntchito za Chauta, ntchito zake zodabwitsa, pa madzi akuya.

²⁵Ndiye kuti Chauta adalamula nautsa namondwe amene adaŵindula mafunde apanyanja.

²⁶Zombozo zidakwera mpaka m'mwamba nkutsikiranso kwakuya, ndipo anthuwo adataya mtima pa mavuto aowo.

²⁷Adachita chizungulire namadzandira ngati anthu oledzera, kenaka nkuthedwa nzeru.

²⁸Tsono anthu aja adalira kwa Chauta pamene anali m'mavuto amenewo, ndipo Chauta adaŵapulumutsa ku mavuto aowo.

²⁹Chauta adatontholetsa namondwe, ndipo mafunde apanyanja adachita bata.

³⁰Choncho anthuwo adasangalala chifukwa kudachita bata, ndipo Chauta adakaŵafikitsa kudooko kumene ankalinga.

³¹Athokoze Chauta chifukwa cha chikondi chake chosasinthika, chifukwa cha ntchito zake zodabwitsa kwa anthu onse.

³²Amtamande pa msonkhano wa anthu, amuyamike pa bwalo la akuluakulu.

³³Adasandutsa mitsinje kuti ikhale chipululu, adasandutsa akasupe a madzi kuti akhale nthaka youma,

³⁴dziko lachonde adalisandutsa nthaka yamchere, chifukwa cha kuipa kwa anthu okhala m'menemo.

³⁵Komanso adasandutsa chipululu kuti chikhale ndi maiŵe a madzi, nthaka youma kuti ikhale akasupe a madzi.

³⁶Ndipo kumeneko Chauta adakhazikako anthu anjala, tsono anthuwo adamanga mzinda woti azikhalamo.

³⁷Adafesa mbeu m'minda, namaoka mipesa, ndipo adakolola dzinthu dzambiri.

³⁸Chifukwa cha madalitso a Chauta, anthuwo adachuluka kwambiri, Chauta sadalole kuti zoŵeta za anthuwo zichepe.

³⁹Pamene anthu ake chiŵerengero chao chidachepa, ndipo pamene adatsitsidwa chifukwa cha mazunzo, mavuto ndi chisoni,

⁴⁰apo Chauta adagwetsa manyozo pa mafumu oŵapsinja naŵasokeretsa, m'chipululu.

⁴¹Koma anthu osoŵa adaŵatulutsa m'mavuto ao, adachulukitsa mabanja ao ngati magulu a nkhosa.

⁴²Anthu olungama mtima amaona zimenezo, nkumasangalala, koma oipa onse amaŵakhalitsa chete.

⁴³Munthu aliyense wanzeru asamale zimenezi, anthu alingalire za chikondi chosasinthika cha Chauta.