Read Buku Loyera - Chichewa Mas. 109 Bible Online

Mas. 109 - Buku Loyera - Chichewa bible

Mas. 109

¹Kwa Woimbitsa Nyimbo. Salmo la Davide. Musakhale chete, Inu Mulungu, amene ndimakutamandani,

²pakuti anthu oipa ndi onama amakamba zondiwukira, amalankhula zondinamizira.

³Ponseponse amandilankhula mau achidani, amandinena popanda chifukwa.

⁴M'malo mwa chikondi changa, iwo amandibwezera zondineneza, ngakhale pamene ndikuŵapempherera.

⁵Motero amandibwezera zoipa m'malo mwa zabwino, amandiwonetsa chidani m'malo mwa chikondi changa.

⁶Sankhulani munthu woipa kuti aweruze mlandu wa wondiwukirayo, iye aimbidwe mlandu ndi munthu woneneza anzake.

⁷Pomuweruza apezeke kuti ali ndi mlandu, mapemphero ake akhale ngati kupalamula.

⁸ Masiku ake akhale oŵerengeka, wina alandire udindo wake.

⁹Ana ake akhale amasiye, ndipo mkazi wake akhale mfedwa.

¹⁰Ana ake azingoyendayenda nkumapemphapempha, apirikitsidwe m'mabwinja m'mene amakhala.

¹¹Wokongoza ndalama amlande zonse zimene ali nazo. Alendo afunkhe zimene adapindula ndi ntchito yake.

¹²Pasapezeke ndi mmodzi yemwe womukomera mtima, kapena wina woŵachitira chifundo ana ake amasiye aja.

¹³Zidzukulu zake zithe nkufa, dzina lao lisamvekenso mu mbadwo wachiŵiri.

¹⁴Chauta asaiŵale machimo a makolo ake, machimo a mai wake asafafanizike.

¹⁵Chauta asakhululukire machimowo mpaka muyaya, anthuwo aiŵalike pa dziko lapansi.

¹⁶Pakuti munthuyo sadakumbukire kuchita chifundo, koma adazunza osauka, osoŵa ndi ovutika mu mtima, mpaka kuŵapha.

¹⁷Ankakonda kutemberera, choncho matemberero amgwere. Sadakonde kudalitsa anthu ena, choncho madalitso akhale kutali ndi iye.

¹⁸Kutemberera anzake kunali ngati chovala chake, motero matemberero amgwere ngati mvula. Akhale ngati mafuta oloŵa m'mafupa mwake.

¹⁹Matemberero akhale ngati mwinjiro wofundira, ngati lamba wovala tsiku ndi tsiku.

²⁰Zimenezi zikhale chilango chochokera kwa Chauta kugwera ondineneza. Ziŵagwere amene amalankhula zoipira moyo wanga.

²¹Koma Inu Mulungu, Ambuye anga, munditchinjirize malinga ndi ulemerero wa dzina lanu, mundipulumutse chifukwa chikondi chanu chosasinthika ndi chabwino.

²²Pakuti ine ndine wosauka ndi wosoŵa, ndipo mtima wanga ukuŵaŵa kwambiri.

²³Ndazimirira ngati mthunzi wamadzulo, ndapirikitsidwa ngati dzombe.

²⁴Maondo anga afooka chifukwa chosala zakudya, thupi langa laonda ndi mutu womwe.

²⁵Ondineneza amandinyodola, akandiwona amapukusa mitu yao.

²⁶Thandizeni Chauta, Mulungu wanga. Pulumutseni chifukwa cha chikondi chanu chosasinthika.

²⁷Adani adziŵe kuti limeneli ndi dzanja lanu londipulumutsa, Inu Chauta, ndinu amene mwachita zimenezi.

²⁸Iwo atemberere, koma Inu mundidalitse. Ondiputa muŵachititse manyazi, koma ine mtumiki wanu ndisangalale.

²⁹Ondineneza akhale onyozeka, manyazi ao aŵakute ngati chovala.

³⁰Ndidzathokoza Chauta kwambiri polankhula. Ndidzamtamanda pakati pa gulu la anthu.

³¹Paja Chauta amaimirira pafupi ndi munthu wosoŵa, amafuna kumpulumutsa kwa anthu ogamula kuti iyeyo aphedwe.