Read Buku Loyera - Chichewa Mas. 111 Bible Online

Mas. 111 - Buku Loyera - Chichewa bible

Mas. 111

¹Tamandani Chauta. Ndidzathokoza Chauta ndi mtima wanga wonse pa msonkhano wa anthu olungama mtima.

²Ntchito za Chauta nzazikulu, onse okondwera nazo amazilingalira.

³Ntchito zake ndi zaulemu ndi zaufumu, ndipo kulungama kwake nkwamuyaya.

⁴Amatikumbutsa ntchito zake zodabwitsa, Chauta ndi wokoma ndi wachifundo.

⁵Amapatsa chakudya anthu omuwopa, amakumbukira chipangano chake nthaŵi zonse.

⁶Amaonetsa anthu ake mphamvu za ntchito zake, poŵapatsa choloŵa cha anthu a mitundu ina.

⁷Ntchito za manja ake nzokhulupirika ndi zolungama. Malamulo ake onse ndi okhulupirika.

⁸Ndi okhazikika mpaka muyaya, paja adaŵapereka ndi mtima wokhulupirika ndi wolungama.

⁹Adapulumutsa anthu ake. Adakhazikitsa chipangano chake kuti chikhale chamuyaya. Dzina lake ndi loyera ndi loopsa.

¹⁰Kuwopa Chauta ndiye chiyambi cha nzeru. Wotsata malamulo ake amakhala ndi nzeru zenizeni. Chauta ndi wotamandika mpaka muyaya.