Read Buku Loyera - Chichewa Mas. 114 Bible Online

Mas. 114 - Buku Loyera - Chichewa bible

Mas. 114

¹ Pamene Israele adatuluka ku Ejipito, pamene banja la Yakobe lidatuluka kuchokera ku mtundu wa anthu a chilankhulo chachilendo,

²Yuda adasanduka malo opatulika a Chauta, Aisraele adasanduka anthu a mu ufumu wake.

³ Nyanja idaona zimenezi nithaŵa, mtsinje wa Yordani udabwerera m'mbuyo.

⁴Mapiri aakulu adalumphalumpha ngati nkhosa zamphongo, nazonso zitunda zidalumpha ngati anaankhosa.

⁵Iwe nyanja, chikukuvuta nchiyani kuti uzithaŵa? Nanga iwe Yordani, ukubwerereranji m'mbuyo?

⁶Inu mapiri, chikukuvutani nchiyani, kuti muzilumphalumpha ngati nkhosa zamphongo? Nanga inu zitunda, mukulumphiranji ngati anaankhosa?

⁷Njenjemera iwe dziko lapansi, chifukwa Chauta akubwera, zoonadi, akubwera Mulungu wa Yakobe.

⁸ Iye amasandutsa thanthwe kukhala dziŵe lamadzi, amasandutsa mwala wolimba kukhala kasupe wa madzi.