Read Buku Loyera - Chichewa Mas. 115 Bible Online

Mas. 115 - Buku Loyera - Chichewa bible

Mas. 115

¹Kwa ife ai, Chauta, kwa ife ai, koma kwa dzina lanu lokha ndiye kukhale ulemerero. Chifukwa ndinu Mulungu wa chikondi chosasinthika ndi wokhulupirika.

²Chifukwa chiyani mitundu ina ya anthu iziti, “Mulungu wao ali kuti?”

³Mulungu wathu ali kumwamba, amachita chilichonse chimene afuna.

⁴ Koma mafano ao ndi asiliva ndi agolide, opangidwa ndi manja a anthu.

⁵Pakamwa ali napo, koma salankhula. Maso ali nawo, koma sapenya.

⁶Makutu ali nawo, koma saamva. Mphuno ali nazo, koma sanunkhiza.

⁷Manja ali nawo, koma akakhudza, samva kanthu. Miyendo ali nayo, koma sayenda, ndipo satulutsa ndi liwu lomwe kukhosi kwao.

⁸Anthu amene amapanga mafanowo amafanafana nawo, chimodzimodzi onse amene amaŵakhulupirira.

⁹Iwe Israele, khulupirira Chauta. Chauta ndiye mthandizi wako ndi chishango chako.

¹⁰Iwe banja la Aroni khulupirira Chauta. Chauta ndiye mthandizi wako ndi chishango chako.

¹¹Inu amene mumaopa Chauta, mkhulupirireni. Chauta ndiye mthandizi wanu ndi chishango chanu.

¹²Chauta watikumbukira ndipo adzatidalitsa. Adzadalitsa anthu a Israele, adzadalitsa banja la Aroni.

¹³ Adzadalitsa amene amamlemekeza, anthu wamba ndi apamwamba omwe.

¹⁴Chauta akudalitseni inu, pamodzi ndi zidzukulu zanu zomwe.

¹⁵Akudalitseni Chauta, amene adalenga kumwamba ndi dziko lapansi.

¹⁶Kumwamba nkwa Chauta, koma dziko lapansi adapatsa anthu.

¹⁷Akufa satamanda Chauta otsikira ku dziko lachete satamanda Chauta.

¹⁸Koma ife tidzatamanda Chauta kuyambira tsopano mpaka muyaya. Tamandani Chauta!