Read Buku Loyera - Chichewa Mas. 116 Bible Online

Mas. 116 - Buku Loyera - Chichewa bible

Mas. 116

¹Ndimakonda Chauta chifukwa amamva mau anga omupemba.

²Iye amatchera khutu kuti andimve, nchifukwa chake ndidzampempha nthaŵi zonse pamene ndili moyo.

³Misampha ya imfa idandizinga, zoopsa za m'dziko la akufa zidandigwera. Ndidaona mavuto, nkugwidwa ndi nthumanzi.

⁴Tsono ndidapemphera potchula dzina la Chauta kuti, “Chauta ndikukupemphani, pulumutsani moyo wanga.”

⁵Chauta ndi wokoma mtima ndi wolungama. Mulungu wathu ndi wachifundo.

⁶Chauta amasunga a mtima wodzichepetsa. Pamene ndidagwa m'zoopsa, Iye adandipulumutsa.

⁷Iwe mtima wanga, bwerera ku malo ako opumulira, chifukwa Chauta wakuchitira zokoma.

⁸Pakuti Inu Chauta, mwandipulumutsa ku imfa, mwaletsa misozi yanga, mwanditeteza kuti ndisaphunthwe.

⁹Ndimayenda pamaso pa Chauta m'dziko la amoyo.

¹⁰ Ndidakhulupirirabe ngakhale pamene ndinkati, “Ndazunzika koopsa.”

¹¹Pamene ndinkachita mantha, ndidati, “Anthu ndi osakhulupirika.”

¹²Ndidzambwezera chiyani Chauta pa zabwino zonse zimene adandichitira?

¹³Ndidzakweza chikho cha chipulumutso, ndidzapemphera potchula dzina la Chauta.

¹⁴Ndidzachita zimene ndidalumbira kwa Chauta pamaso pa anthu ake onse.

¹⁵Imfa ya anthu oyera mtima a Chauta, ndi yamtengowapatali pamaso pake.

¹⁶Chauta, ine ndine mtumiki wanu, mtumiki wanu weniweni, mwana wa mdzakazi wanu. Inu mwamasula maunyolo anga.

¹⁷Ndidzapereka kwa Inu nsembe yothokozera, ndidzapemphera potchula dzina la Inu, Chauta.

¹⁸Ndidzachita zimene ndidalumbira kwa Chauta pamaso pa anthu ake onse.

¹⁹Ndidzazipereka m'mabwalo a Nyumba ya Mulungu, mu mzinda wa Yerusalemu. Tamandani Chauta!