Read Buku Loyera - Chichewa Mas. 118 Bible Online

Mas. 118 - Buku Loyera - Chichewa bible

Mas. 118

¹ Thokozani Chauta chifukwa ngwabwino, ndipo chikondi chake nchamuyaya.

²Aisraele anene kuti, “Chikondi chake nchamuyaya.”

³Banja la Aroni linene kuti, “Chikondi chake nchamuyaya.”

⁴Anthu oopa Chauta anene kuti, “Chikondi chake nchamuyaya.”

⁵Pamene ndinali m'mavuto ndidapemphera kwa Chauta, ndipo Iye adandichotsera mavutowo.

⁶ Chauta akakhala pa mbali yanga, sindichita mantha. Munthu angandichite chiyani?

⁷Chauta ali pa mbali yanga kuti andithandize. Odana nane ndidzaŵayang'ana monyoza nditaŵapambana.

⁸Kuthaŵira kwa Chauta nkwabwino kupambana kukhulupirira munthu.

⁹Kuthaŵira kwa Chauta nkwabwino kupambana kukhulupirira mafumu.

¹⁰Adani a mitundu yonse adandizinga, koma ndidaŵaononga ndi mphamvu za dzina la Chauta.

¹¹Adandizinga, inde adandizinga pa mbali zonse, koma ndidaŵaononga ndi mphamvu za dzina la Chauta.

¹²Adandizinga ngati njuchi, koma adatha msanga ngati moto wapaminga. Ndidaŵaononga ndi mphamvu za dzina la Chauta.

¹³Adandikankha kwambiri, kotero kuti ndinali pafupi kugwa, koma Chauta adandithandiza.

¹⁴Chauta amene ndimamuimbira ndiye mphamvu zanga. Ndiye mpulumutsi wanga.

¹⁵Mverani nyimbo m'mahema mwa anthu a Mulungu, nyimbo zokondwerera kupambana, zakuti, “Dzanja lamanja la Chauta limagonjetsa mwamphamvu,

¹⁶dzanja lamanja la Chauta lapambana, dzanja lamanja la Chauta limagonjetsa mwamphamvu.”

¹⁷Sindidzafa, ndidzakhala moyo, ndipo ndidzalalika ntchito za Chauta.

¹⁸Chauta wandilanga koopsa, koma sadandisiye kuti ndife.

¹⁹Tsekulireni zipata za Nyumba ya Mulungu, kuti ndifike ku malo ake achilungamo, ndikathokoze Chauta.

²⁰Ichi ndicho chipata cha Chauta, anthu okhawo ochita chifuniro chake adzaloŵera pamenepa.

²¹Ndikukuyamikani popeza kuti mwandiyankha, ndipo mwasanduka Mpulumutsi wanga.

²² Mwala umene amisiri omanga nyumba adaukana, womwewo wasanduka mwala wapangodya.

²³Chauta ndiye amene wachita zimenezi, zimenezi nzodabwitsa pamaso pathu.

²⁴Lero ndiye tsiku limene Chauta adalipanga. Tiyeni tikondwe ndi kusangalala pa tsiku limeneli.

²⁵ Tipulumutseni, tikukupemphani Inu Chauta. Chauta, tikukupemphani kuti zinthu zitiyendere bwino.

²⁶ Ngwodala amene alikudza m'dzina la Chauta. Tikufunirani madalitso ochokera m'nyumba ya Chauta.

²⁷Chauta ndi Mulungu, ndipo watipatsa kuŵala. Yambani mdipiti wachikondwerero mutatenga nthambi, mpaka kukafika ku guwa lansembe.

²⁸Inu ndinu Mulungu wanga, ndidzakuthokozani. Inu ndinu Mulungu wanga, ndidzakutamandani.

²⁹Thokozani Chauta pakuti ngwabwino, ndipo chikondi chake chosasinthika nchamuyaya.