Read Buku Loyera - Chichewa Mas. 119 Bible Online

Mas. 119 - Buku Loyera - Chichewa bible

Mas. 119

¹Ngodala amene moyo wao ulibe choŵadzudzulira, amene amayenda motsata malamulo a Chauta.

²Ngodala amene amasunga malamulo a Chauta, amene amafunafuna Chauta ndi mtima wao wonse,

³amene sachita zolakwa, koma amayenda m'njira za Chauta.

⁴Inu Chauta, mwapereka malamulo anu ndipo mwalamula kuti atsatidwe kwathunthu.

⁵Ndikadakonda kuti njira zanga zikhale zokhulupirika, pakumvera malamulo anu.

⁶Tsono anthu sadzandichititsa manyazi, ndikatsata malamulo anu onse.

⁷Ndidzakutamandani ndikuchita zoyenera, ndikaphunzira malangizo anu olungama.

⁸Ndidzatsata malamulo anu, musandisiye konse ndekha.

⁹Kodi mnyamata angathe bwanji kusunga makhalidwe ake kuti akhale angwiro? Akaŵasamala potsata mau anu.

¹⁰Ndimakufunafunani ndi mtima wanga wonse, musalole kuti ndisiye kumvera malamulo anu.

¹¹Ndasunga mau anu mumtima mwanga, kuti ndisakuchimwireni.

¹²Mutamandike, Inu Chauta, phunzitseni malamulo lanu.

¹³Ndimalalika ndi mau anga malangizo onse a pakamwa panu.

¹⁴Kuyenda m'njira ya malamulo anu kumandikondwetsa, kupambana kukhala ndi chuma chilichonse.

¹⁵Ndidzasinkhasinkha za malamulo anu, ndipo ndidzatsata njira zanu.

¹⁶Ndidzakondwera ndi malamulo anu, ndipo mau anu sindidzaŵaiŵala.

¹⁷Komereni mtima ine mtumiki wanu, kuti ndikhale ndi moyo ndi kusunga mau anu.

¹⁸Tsekulani maso anga kuti ndiwone zodabwitsa zochokera m'malamulo anu.

¹⁹Ndine munthu wongokhala nawo pa dziko lapansi, musandibisire malamulo anu.

²⁰Mtima wanga wafooka chifukwa cholakalaka malangizo anu nthaŵi zonse.

²¹Inu mumadzudzula onyada, amene ali otembereredwa, amene amasiya malamulo anu.

²²Mundichotsere zonyoza zao zondinyodola, chifukwa ndasunga malamulo anu.

²³Ngakhale mafumu andichitire upo woipa, ine mtumiki wanu ndidzasinkhasinkhabe za malamulo anu.

²⁴Malamulo anu amandikondwetsa, ndiwo amene amandilangiza.

²⁵Ndangoti thapsa m'fumbi. Bwezereni moyo monga momwe mudalonjezera.

²⁶Pamene ndidasimba za njira zanga, Inu mudandiyankha. Phunzitseni malamulo anu.

²⁷Mundidziŵitse mfundo za malamulo anu, ndipo ndidzasinkhasinkha za ntchito zanu zodabwitsa.

²⁸Ndafookeratu ndi chisoni. Limbitseni monga momwe mudalonjezera.

²⁹Mundichotse m'njira zondisokeza, kuti ndisayendemo. Mundikomere mtima pondiphunzitsa malamulo anu.

³⁰Ine ndasankhula njira yoti ndizikhala wokhulupirika, ndaika malangizo anu mumtima mwanga.

³¹Ndimakangamira malamulo anu, Inu Chauta, musalole kuti anthu andichititse manyazi.

³²Ndidzatsata mokondwa njira ya malamulo anu, mukandiwonjezera nzeru.

³³Chauta, phunzitseni njira zosungira malamulo anu, ndipo ndidzazitsata mpaka kumathero.

³⁴Patseni nzeru kuti ndizisunga malamulo anu, ndiziŵatsata ndi mtima wanga wonse.

³⁵Munditsogolere kuti ndimvere malamulo anu, chifukwa ndimakondwera nawo.

³⁶Muphunzitse mtima wanga kuti uzikonda malamulo anu, osati chuma.

³⁷Letsani maso anga kuti asamayang'ane zachabe, mundipatse moyo monga momwe mudalonjezera.

³⁸Munditsimikizire ine mtumiki wanu chipangano chanu, chimene mumachita ndi anthu okuwopani.

³⁹Mundichotsere chipongwe chimene ndimachiwopa, chifukwa malangizo anu ndi abwino.

⁴⁰Onani ndikulakalaka kutsata malamulo anu. Mundipatse moyo chifukwa ndinu olungama.

⁴¹Chauta, mundikonde ndi chikondi chanu chosasinthika, mundipulumutse monga momwe mudalonjezera.

⁴²Pamenepo ndidzakhala nchoŵayankha anthu ondinyodola, pakuti ndimakhulupirira mau anu.

⁴³Pakamwa panga musapaletse mpang'ono pomwe kulankhula mau anu oona, pakuti ndimakhulupirira malangizo anu.

⁴⁴Ndidzatsata malamulo anu kosalekeza mpaka muyaya,

⁴⁵ndipo ndidzayenda ndi ufulu, chifukwa ndasamala malamulo anu.

⁴⁶Ndidzalankhula malamulo anu pamaso pa mafumu, ndipo anthu sadzandichititsa manyazi.

⁴⁷Inetu ndimasangalala ndi malamulo anu amene ndimaŵakonda.

⁴⁸Ndimalemekeza malamulo anu amene ndimaŵakonda, ndipo ndimasinkhasinkha za malamulowo.

⁴⁹Kumbukirani mau anu aja kwa ine mtumiki wanu, mau amene amandipatsa chikhulupiriro.

⁵⁰Chimene chimandisangalatsa m'masautso anga nchakuti malonjezo anu amandipatsa moyo.

⁵¹Anthu osasamala za Mulungu amandinyoza kwathunthu, komabe sindisiyana nawo malamulo anu.

⁵²Inu Chauta, ndikamalingalira malamulo anu akalekale, ndimasangalala,

⁵³Ndimapsa mtima kwambiri chifukwa cha anthu oipa amene amaphwanya malamulo anu.

⁵⁴Malamulo anu asanduka nyimbo yanga kulikonse kumene ndimapita.

⁵⁵Ndimakukumbukirani usiku, Inu Chauta, ndipo ndimatsata malamulo anu.

⁵⁶Madalitso ameneŵa andifikira ine, pakuti ndimatsata malamulo anu.

⁵⁷Inu Chauta, zanga zonse ndinu, ndikulonjeza kumvera mau anu.

⁵⁸Ndikukupemphani ndi mtima wanga wonse, mundikomere mtima molingana ndi malonjezo anu aja.

⁵⁹Ndikamalingalira njira zanga, ndimatembenuka kuti nditsate malamulo anu.

⁶⁰Ndimafulumira, sindizengereza kutsata malamulo anu.

⁶¹Ngakhale anthu oipa anditchere msampha, sindiiŵala malamulo anu.

⁶²Ndimadzuka pakati pa usiku kuti ndikutamandeni, chifukwa cha malangizo anu olungama.

⁶³Ine ndine bwenzi la anthu okuwopani, anthu otsata malamulo anu.

⁶⁴Inu Chauta, dziko lapansi nlodzaza ndi chikondi chanu chosasinthika, phunzitseni malamulo anu.

⁶⁵Inu Chauta, mwandikomera mtima mtumiki wanune, molingana ndi mau anu.

⁶⁶Patseni luntha ndi nzeru, chifukwa ndimakhulupirira malamulo anu.

⁶⁷Ndisanayambe kulangika ndinkasokera, koma tsopano ndimamvera mau anu.

⁶⁸Inu ndinu abwino, ndipo mumachita zabwino, phunzitseni malamulo anu.

⁶⁹Anthu osasamala za Mulungu amandisinjirira, komabe ndimatsata malamulo anu ndi mtima wanga wonse.

⁷⁰Anthu otere ndi opulukira, koma ine ndimakondwa ndi malamulo anu.

⁷¹Ndi bwino kuti ndidalangidwa, kuti ndiphunzire malamulo anu.

⁷²Malamulo a pakamwa panu amandikomera kuposa ndalama zikwizikwi zagolide ndi zasiliva.

⁷³Manja anu adandilenga ndi kundiwumba. Patseni nzeru zomvetsa, kuti ndiziphunzira malamulo anu.

⁷⁴Anthu okuwopani adzandiwona ndipo adzakondwa, popeza kuti ndakhulupirira mau anu.

⁷⁵Inu Chauta, ndikudziŵa kuti kuweruza kwanu nkolungama, ndipo mwandilanga potsata kukhulupirika kwanu.

⁷⁶Chikondi chanu chosasinthika chindisangalatse ine mtumiki wanu, monga momwe mudalonjezera.

⁷⁷Mundichitire chifundo kuti ndikhale ndi moyo, pakuti malamulo anu amandikondwetsa.

⁷⁸Anthu osasamala za Mulungu muŵachititse manyazi, chifukwa andilakwira pondinamizira. Koma ine ndidzasinkhasinkha za malamulo anu.

⁷⁹Anthu okuwopani abwere kwa ine kuti aphunzire malamulo anu.

⁸⁰Mtima wanga ukhale wopanda choudzudzulira pa malamulo anu, kuti ndisachite manyazi.

⁸¹Moyo wanga wafooka podikira chipulumutso chanu, ndikukhulupirira mau anu.

⁸²Maso anga afiira nkuyang'anira malonjezo anu. Ndimafunsa kuti, “Kodi mudzandithandiza liti?”

⁸³Ndasanduka ngati thumba lachikopa lokhwinyata, komabe sindiiŵala malamulo anu.

⁸⁴Kodi mtumiki wanune ndipirire mpaka liti? Kodi anthu ondizunza mudzaŵalanga liti?

⁸⁵Anthu osasamala za Mulungu, osatsata malamulo anu, andikumbira mbuna.

⁸⁶Malamulo anu onse ndi osasinthika. Anthuwo amandizunza ndi mabodza ao; thandizeni!

⁸⁷Adatsala pang'ono kundichotsa pa dziko lapansi, komabe sindidaleke kutsata malamulo anu.

⁸⁸Sungani moyo wanga chifukwa cha chikondi chanu chosasinthika, kuti nditsate malamulo anu.

⁸⁹Inu Chauta, mau anu ngokhazikika kumwambako mpaka muyaya.

⁹⁰Kukhulupirika kwanu kumakhala mpaka pa mibadwo yonse. Inu mwakhazikitsa dziko, ndipo siligwedezeka.

⁹¹Zolengedwa zikupezeka lero lino chifukwa cha kulamula kwanu, pakuti zinthu zonse zimakutumikirani.

⁹²Malamulo anu akadapanda kundisangalatsa, bwenzi nditafa ndi mazunzo anga.

⁹³Sindidzaiŵala konse malangizo anu, pakuti mwandipatsa nawo moyo.

⁹⁴Ndine wanu, pulumutseni, pakuti ndasamala malamulo anu.

⁹⁵Anthu oipa amandiŵenda kuti andiwononge, koma ine ndimalingalira za malamulo anu.

⁹⁶Ndazindikira kuti zabwino zonse zili ndi malire, koma malamulo anu alibe konse malire.

⁹⁷Ndimakonda malamulo anu kwambiri, ndimasinkhasinkha za malamulowo tsiku lonse.

⁹⁸Malamulo anu amandisandutsa wanzeru kuposa adani anga, popeza kuti malamulowo ndili nawo nthaŵi zonse.

⁹⁹Ndili ndi nzeru za kumvetsa kupambana aphunzitsi anga onse, pakuti ndimasinkhasinkha za malamulo anu.

¹⁰⁰Ndili ndi nzeru kupambana okalamba, pakuti ndimatsata malamulo anu.

¹⁰¹Ndimaletsa miyendo yanga kuti isayende m'njira yoipa iliyonse, kuti choncho ndizisunga mau anu.

¹⁰²Sindisiyana nawo malangizo anu, pakuti Inu mudandiphunzitsa

¹⁰³mau anu ndi otsekemera kwambiri ndikaŵalaŵa. Amatsekemera kuposa uchi m'kamwa mwanga.

¹⁰⁴Ndimakhala ndi nzeru za kumvetsa chifukwa cha malamulo anu. Nchifukwa chake ndimadana ndi njira iliyonse yonyenga.

¹⁰⁵mau anu ndiye nyale ya mapazi anga, ndipo amaunikira njira yanga.

¹⁰⁶Ndalumbirira, ndipo ndatsimikiza kuti ndidzamvera malangizo anu olungama.

¹⁰⁷Ndazunzika koopsa, Chauta, patseni moyo, molingana ndi mau anu aja.

¹⁰⁸Chauta, landirani mapemphero anga oyamika, ndipo mundiphunzitse malangizo anu.

¹⁰⁹Moyo wanga uli m'zoopsa nthaŵi zonse, komabe sindiiŵala malamulo anu.

¹¹⁰Anthu oipa anditchera msampha, komabe sindisokera kuchoka m'njira ya malamulo anu.

¹¹¹Malamulo anu ndiye madalitso anga mpaka muyaya, zoonadi, ndiwo amene amasangalatsa mtima wanga.

¹¹²Mtima wanga muuphunzitse kuti uzikonda malamulo anu nthaŵi zonse.

¹¹³Ndimadana nawo anthu apaŵiripaŵiri, koma ndimakonda mau anu.

¹¹⁴Inu ndinu malo anga obisalako ndiponso chishango changa, ndimakhulupirira mau anu.

¹¹⁵Chokereni inu, anthu ochita zoipanu, kuti ine ndizitsata malamulo a Mulungu wanga.

¹¹⁶Chirikizeni molingana ndi malonjezo anu aja, kuti ndizikhala ndi moyo, ndipo anthu asandichititse manyazi, chifukwa ndine wokhulupirika.

¹¹⁷Chirikizeni kuti ndipulumuke, kuti nthaŵi zonse ndizitsata malamulo anu.

¹¹⁸Inu mumaŵakana anthu onse osamvera malamulo anu, zoonadi, kuchenjera kwao nkopandapake.

¹¹⁹Anthu onse oipa a pa dziko lapansi, mumaŵayesa ngati zakudzala, nchifukwa chake ndimakonda malamulo anu.

¹²⁰Thupi langa limanjenjemera chifukwa chokuwopani, ndimachita mantha ndi kuweruza kwanu.

¹²¹Ndachita zimene zili zolungama ndi zabwino. Musandisiye m'manja mwa ondizunza.

¹²²Lonjezani kuti mudzandichitira zabwino mtumiki wanune, musalole anthu osasamala za Mulungu kuti andizunze.

¹²³Maso anga atopa chifukwa cha kuyembekeza chipulumutso chanu, chifukwa cha kudikira kuti malonjezo anu olungama aja achitikedi.

¹²⁴Komereni mtima mtumiki wanune, chifukwa cha chikondi chanu chosasinthika, ndipo mundiphunzitse malamulo anu.

¹²⁵Ndine mtumiki wanu, mundipatse nzeru zomvetsa, kuti ndizidziŵa malamulo anu.

¹²⁶Yakwana nthaŵi yakuti Inu Chauta muchitepo kanthu, popeza kuti anthu aphwanya malamulo anu.

¹²⁷Koma ine ndimasamala malamulo anu kupambana golide, golide wosungunula bwino.

¹²⁸Malamulo anu onse amalungamitsa mayendedwe anga. Ndimadana ndi njira iliyonse yonyenga.

¹²⁹Malamulo anu ndi abwino, nchifukwa chake ndimaŵatsata ndi mtima wanga wonse.

¹³⁰Kufotokozera mau anu kumakhala ngati kuŵala, kumapatsa nzeru za kumvetsa kwa anthu opanda nzeru.

¹³¹Ndimapuma mwaŵefuŵefu nditatsekula pakamwa, chifukwa ndimalakalaka malamulo anu.

¹³²Yang'aneni, ndipo mundikomere mtima monga m'mene mumachitira ndi anthu okukondani.

¹³³Chirikizani mayendedwe anga molingana ndi mau anu aja, musalole kuti tchimo lililonse lizindilamulira.

¹³⁴Pulumutseni kwa anthu ondizunza, kuti ndizitsata malamulo anu.

¹³⁵Yang'anireni ine mtumiki wanu ndi chikondi chanu, ndipo mundiphunzitse malamulo anu.

¹³⁶Maso anga akudza misozi yambiri ngati mitsinje, chifukwa anthu satsata malamulo anu.

¹³⁷Ndinu olungama Chauta, ndipo kuweruza kwanu nkolungama.

¹³⁸Malamulo amene mwatipatsa, ndi olungama ndi okhulupirika ndithu.

¹³⁹Changu changa chikuyaka ngati moto mumtima mwanga, chifukwa adani anga amaiŵala mau anu.

¹⁴⁰Malonjezo anu ndi otsimikizika, ndipo ine mtumiki wanu ndimaŵakonda.

¹⁴¹Ine ndine wamng'ono ndi wonyozeka, komabe sindiiŵala malamulo anu.

¹⁴²Kulungama kwanu nkwamuyaya, ndipo malamulo anu ndi oona.

¹⁴³Mavuto andigwera pamodzi ndi zoŵaŵa zomwe, koma malamulo anu amandisangalatsa.

¹⁴⁴Malamulo anu ndi olungama mpaka muyaya, patseni nzeru zomvetsa kuti ndizikhala ndi moyo.

¹⁴⁵Ndikulira kwa Inu ndi mtima wanga wonse, mundiyankhe, Inu Chauta. Ndidzatsata malamulo anu.

¹⁴⁶Ndikukulirirani, mundipulumutse, kuti ndizitsata malamulo anu.

¹⁴⁷Ndimadzuka tambala asanalire, kuti ndipemphe chithandizo. Ndimakhulupirira mau anu.

¹⁴⁸Ndimakhala maso usiku wonse, ndikusinkhasinkha za malonjezo anu.

¹⁴⁹Imvani liwu langa chifukwa cha chikondi chanu chosasinthika. Inu Chauta, sungani moyo wanga chifukwa cha chilungamo chanu.

¹⁵⁰Anthu ankhanza ondizunza akuyandikira. Iwo ali kutali ndi malamulo anu.

¹⁵¹Koma Inu Chauta muli pafupi, ndipo malamulo anu onse ndi oona.

¹⁵²Poŵerenga malamulo anu ndidadziŵa kale lomwe kuti Inu mudaŵakhazikitsa mpaka muyaya.

¹⁵³Yang'anani masautso anga, ndipo mundipulumutse, popeza kuti sindiiŵala malamulo anu.

¹⁵⁴Munditchinjirize pa mlandu wanga, ndipo mundiwombole. Mundipatse moyo molingana ndi malonjezo anu aja.

¹⁵⁵Chipulumutso chili kutali ndi anthu oipa, pakuti safunafuna malamulo anu.

¹⁵⁶Chifundo chanu nchachikulu, Inu Chauta, mundipatse moyo molingana ndi chilungamo chanu.

¹⁵⁷Anthu ondizunza ndiponso adani anga ngochuluka, koma sindisiyana nawo malamulo anu.

¹⁵⁸Ndimanyansidwa ndikamayang'ana anthu osakhulupirika, chifukwa satsata malamulo anu.

¹⁵⁹Onani m'mene ndimakondera malamulo anu, sungani moyo wanga chifukwa cha chikondi chanu chosasinthika

¹⁶⁰mau anu ndi oona okhaokha, malangizo anu onse olungama ngamuyaya.

¹⁶¹Mafumu amandizunza popanda chifukwa, koma mtima wanga umaopa mau anu.

¹⁶²Ndimakondwa ndi mau anu monga munthu amene wapeza chuma chambiri.

¹⁶³Ndimadana ndi anthu abodza, zoonadi, ndimanyansidwa nawo, koma ndimakonda malamulo anu.

¹⁶⁴Ndimakutamandani kasanunkaŵiri pa tsiku, chifukwa cha malangizo anu olungama.

¹⁶⁵Anthu okonda malamulo anu ali ndi mtendere waukulu, palibe china chotha kuŵagwetsa.

¹⁶⁶Ndimakhulupirira kuti mudzandipulumutsa, Inu Chauta, ndipo ndimatsata malamulo anu.

¹⁶⁷Mzimu wanga umatsata malamulo anu, pakuti ndimaŵakonda ndi mtima wanga wonse.

¹⁶⁸Ndimatsata malamulo anu ndi malangizo anu, pakuti makhalidwe anga onse mukuŵaona.

¹⁶⁹Kulira kwanga kumveke kwa Inu, Chauta. Mundipatse nzeru zomvetsa potsata mau anu aja.

¹⁷⁰Kupempha kwanga kumveke kwa Inu. Mundipulumutse potsata malonjezo anu.

¹⁷¹Pakamwa panga padzakutamandani, chifukwa mumandiphunzitsa malamulo anu.

¹⁷²Ndidzaimba nyimbo zoyamikira mau anu, chifukwa malamulo anu onse ndi olungama.

¹⁷³Dzanja lanu likhale lokonzeka kundithandiza, chifukwa ndatsata malamulo anu.

¹⁷⁴Ndikulakalaka nthaŵi yoti mudzandipulumutse. Inu Chauta, malamulo anu amandikondwetsa.

¹⁷⁵Lolani kuti ndikhale moyo, kuti ndizikutamandani, ndipo malangizo anu azindithandiza.

¹⁷⁶Ndasokera ngati nkhosa yoloŵerera, koma mundifunefune ine mtumiki wanu, pakuti sindiiŵala malamulo anu. Nyimbo yoimba pokwera ku Yerusalemu.