Read Buku Loyera - Chichewa Mas. 132 Bible Online

Mas. 132 - Buku Loyera - Chichewa bible

Mas. 132

¹Nyimbo yoimba pokwera ku Yerusalemu. Inu Chauta, mukumbukire Davide ndi mavuto onse amene adaŵapirira.

²Adalumbira kwa Inu Chauta, nalonjeza kwa Mulungu Wamphamvuzonse wa Yakobe kuti,

³“Ndithu sindidzaloŵa m'nyumba mwanga, kapena kukagona pabedi panga,

⁴sindidzalola kuti ndikhale m'tulo kapena kuti zikope zanga ziwodzere,

⁵mpaka nditapezera Chauta malo, malo oti Mulungu Wamphamvuzonse wa Yakobe azikhalamo.”

⁶ Tidamva za bokosi lachipangano ku Efurata, tidalipeza m'minda ya ku Yaara.

⁷“Tiyeni tipite kumalo kumene Chauta amakhala. Tiyeni tikapembedze ku mpando wake wachifumu.”

⁸Dzambatukani, Inu Chauta, ndi kupita ku malo anu kumene mumakhala, Inuyo pamodzi ndi bokosi lachipangano lofanizira mphamvu zanu.

⁹Ansembe anu avale chilungamo ngati nsalu, anthu anu oyera mtima afuule ndi chimwemwe.

¹⁰Chifukwa cha zimene mudalonjeza kwa mtumiki wanu Davide, musakane nkhope ya wodzozedwa wanu.

¹¹ Chauta adalumbirira Davide momtsimikizira, ndipo sadzasintha, adati, “Ndidzakhazika pa mpando wachifumu mmodzi mwa ana ako aamuna.

¹²Ngati ana ako aamuna asunga chipangano changa ndi malamulo anga amene ndidzaŵaphunzitsa, ana aonso adzakhala pa mpando wako wachifumu mpaka muyaya.”

¹³Chauta wasankhula Ziyoni, akufuna kuti akhale malo ake okhalamo.

¹⁴Akuti, “Ameneŵa ndiwo malo anga opumuliramo mpaka muyaya. Ndidzakhala kuno chifukwa ndakufunitsitsa.

¹⁵“Ndidzadalitsa kwambiri mzinda wa Ziyoni poupatsa zosoŵa zake, anthu ake osauka, ndidzaŵapatsa chakudya chokwanira.

¹⁶Ansembe ake ndidzaŵaveka chipulumutso, anthu ake oyera mtima adzafuula ndi chimwemwe.

¹⁷ “Davide ndidzammeretsera chiphukira kumeneko. Ndamkonzera nyale wodzozedwa wanga.

¹⁸Adani ake ndidzaŵaveka manyazi ngati nsalu, koma iye yekhayo adzavala chisoti choŵala chachifumu.”