Read Buku Loyera - Chichewa Mas. 135 Bible Online

Mas. 135 - Buku Loyera - Chichewa bible

Mas. 135

¹Salmo la Davide. Tamandani Chauta. Tamandani dzina la Chauta, Perekani matamando, inu atumiki a Chauta,

²inu amene mumatumikira m'Nyumba ya Chauta, m'mabwalo a Nyumba ya Mulungu wathu!

³Tamandani Chauta, pakuti ngwabwino. Muimbireni nyimbo zotamanda dzina lake, pakuti nlokoma kwambiri.

⁴Wadzisankhulira Yakobe kuti akhale wake, Israele kuti akhale chuma chake.

⁵Pakuti ndimadziŵa kuti Chauta ndi wamkulu, kuti Chauta, Mulungu wathu, ndi wamphamvu kupambana milungu yonse.

⁶Chilichonse chimene Chauta amafuna kuchita amachitadi kumwamba ndi pa dziko lapansi, m'nyanja ndi monse mozama.

⁷Ndiye amene amatulutsa mitambo ku mathero a dziko lapansi, amene amachititsa zing'aning'ani za mvula, amene amaombetsa mphepo kuchokera m'nkhokwe zake.

⁸Ndiye amene adapha ana achisamba a ku Ejipito, ana a anthu ndi a nyama omwe,

⁹amene adaonetsa Farao ndi atumiki ake onse zizindikiro zamphamvu ndi zodabwitsa m'dziko la Ejipito.

¹⁰Ndiye amene adaononga mitundu yambiri ya anthu, ndi kupha mafumu amphamvu aja,

¹¹Sihoni, mfumu ya Aamori, ndi Ogi, mfumu ya ku Basani, pamodzi ndi maufumu onse a ku Kanani.

¹²Adapereka dziko lao kuti likhale choloŵa, choloŵa cha Aisraele, anthu ake.

¹³Dzina lanu, Inu Chauta, nlamuyaya, kutchuka kwanu ndi kwa pa mibadwo yonse.

¹⁴Pakuti Chauta adzaweruza anthu ake kuti alibe mlandu, adzachitira chifundo atumiki ake.

¹⁵ Mafano a mitundu ina ya anthu ndi asiliva ndi agolide chabe, ndi opangidwa ndi manja a anthu.

¹⁶Pakamwa ali napo, koma salankhula, maso ali nawo, koma sapenya.

¹⁷Makutu ali nawo, koma saamva, ndipo alibe mpweya m'kamwa mwao.

¹⁸Anthu amene amapanga mafanowo afanefane nawo, chimodzimodzi onse amene amaŵakhulupirira.

¹⁹Inu a m'banja la Israele, tamandani Chauta! Inu a m'banja la Aroni, tamandani Chauta!

²⁰Inu a banja la Levi, tamandani Chauta! Inu amene mumaopa Chauta, tamandani Chauta!

²¹Atamandike ku Ziyoni Chauta, amene amakhala ku Yerusalemu! Tamandani Chauta!