Read Buku Loyera - Chichewa Mas. 137 Bible Online

Mas. 137 - Buku Loyera - Chichewa bible

Mas. 137

¹M'mbali mwa mitsinje ya ku Babiloni, kumeneko tidakhala pansi nkumalira tikukumbukira Ziyoni.

²Kumeneko tidapachika apangwe athu pa mitengo ya misondodzi.

³Kumeneko anthu otigwira ukapolo adatipempha kuti tiimbe nyimbo. Otizunza adatipempha kuti tisangalale, adati, “Tatiimbiraniko nyimbo ya ku Ziyoni.”

⁴Tsono ife tidati, “Tingaimbe bwanji nyimbo ya Chauta kuchilendo ngati kuno?”

⁵Ndikakuiŵala iwe Yerusalemu, dzanja langa lamanja liwume.

⁶Lilime langa likangamire ku mnakanaka m'kamwa mwanga, ndikapanda kukukumbukira iwe Yerusalemu ndi kukuwona kuti ndiwe wondisangalatsa kwambiri.

⁷Kumbukirani, Inu Chauta, zimene adachita Aedomu pa tsiku lija la kuwonongeka kwa Yerusalemu, muja ankati, “Mgwetseni pansi, mgwetseni pansi, mpaka pa maziko ake.”

⁸ Mzinda wa Babiloni, iwe woyenera kuwonongedwawe, adzakhala wodala munthu amene adzakubwezera zimene watichita ifezi.

⁹Adzakhala wodala munthu amene adzatenga makanda ako ndi kuŵakankhanthitsa ku thanthwe.