Read Buku Loyera - Chichewa Mas. 139 Bible Online

Mas. 139 - Buku Loyera - Chichewa bible

Mas. 139

¹Kwa Woimbitsa Nyimbo. Salmo la Davide. Chauta mwafufuzafufuza, ndipo mwandidziŵa.

²Inu mumadziŵa pamene ndikhala pansi, pamenenso ndidzuka, mumazindikira maganizo anga muli kutali.

³Mumandipenyetsetsa ndikamayenda ndiponso ndikamagona, mumadziŵa njira zanga zonse.

⁴Ngakhale mau anga asanafike pakamwa panga, Inu Chauta mumaŵadziŵa onse.

⁵Mumandizinga kumbuyo ndi kutsogolo, ndipo mumandisanjika dzanja lanu.

⁶Nzeru zimenezi nzopitirira nzeru zanga, nzapamwamba, sindingathe kuzimvetsa.

⁷Ndidzapita kuti, pofuna kupewa Mzimu wanu, kapena pofuna kuthaŵa nkhope yanu?

⁸Ndikakwera kumwamba, Inu muli komweko, ndikagona m'dziko la anthu akufa, Inu muli momwemo.

⁹Ndikaulukira kotulukira dzuŵa, kapena kukafika kuzambwe, ku mathero a nyanja,

¹⁰ngakhale kumenekonso mudzanditsogolera, dzanja lanu lamanja lidzandichirikiza.

¹¹Ndikanena kuti, “Mdima undiphimbe, kuŵala kumene kwandizinga kusanduke mdima,”

¹²ngakhale mdimawo, kwa Inu si mdima konse, kwa Inu usiku umaŵala ngati usana, mdima uli ngati kuŵala.

¹³Paja ndinu mudapanga za m'kati mwanga, mudandiwumba m'mimba mwa amai anga.

¹⁴Ndikukutamandani, Inu oopsa ndi odabwitsa. Ntchito zanu zonse nzodabwitsa. Mumandidziŵa bwino kwambiri.

¹⁵Mapangidwe anga sadabisike pamaso panu pamene ndinkapangidwa mwachinsinsi, pamene ndinkaumbidwa mwaluso m'mimba mwa amai anga.

¹⁶Maso anu adandiwona ndisanabadwe. Masiku a moyo wanga mudaŵalemberatu m'buku mwanu, asanayambe nkuŵerengedwa komwe.

¹⁷ Maganizo anu, Inu Mulungu, ndi ozama kwa ine, ndi osaŵerengeka konse.

¹⁸Ndikadaŵaŵerenga, bwenzi ali ambiri koposa mchenga. Ndikamadzuka ndimakhala nanube.

¹⁹Ndikadakonda kuti muwononge anthu oipa, Inu Mulungu, ndipo kuti anthu okhetsa magazi andichokere.

²⁰Anthuwo amakunenani zinthu zoipa, namakuukirani ndi mtima woipa.

²¹Kodi sindidana nawo anthu odana nanu, Inu Chauta? Kodi sindinyansidwa nawo anthu okuukirani?

²²Ndimadana nawo ndi chidani chenicheni. Ndimaŵayesa adani anga.

²³Fufuzeni, Inu Mulungu, kuti mudziŵe mtima wanga. Yeseni kuti mudziŵe maganizo anga.

²⁴Muwone ngati ndimatsata njira yoipa iliyonse, ndipo munditsogolere m'njira yanu yamuyaya.