Read Buku Loyera - Chichewa Mas. 140 Bible Online

Mas. 140 - Buku Loyera - Chichewa bible

Mas. 140

¹Kwa Woimbitsa Nyimbo. Salmo la Davide. Pulumutseni, Inu Chauta, kwa anthu oipa. Tchinjirizeni kwa anthu ankhanza.

²Iwo amalingalira mumtima mwao kuti achite zoipa, amautsa nkhondo nthaŵi zonse.

³Amanola lilime lao kuti likhale ngati la njoka, m'kamwa mwao muli ululu wa mamba.

⁴Inu Chauta, tetezeni kwa anthu oipa, tchinjirizeni kwa anthu andeu, amene amaganiza zofuna kundigwetsa.

⁵Anthu odzikuza anditchera msampha mobisika, atchera ukonde wa zingwe, anditchera misampha m'mbali mwa njira.

⁶Ndimauza Chauta kuti, “Inu ndinu Mulungu wanga,” tcherani khutu kuti mumve liwu la kupemba kwanga, Inu Chauta.

⁷Inu Chauta, Ambuye anga, Mpulumutsi wanga wamphamvu, mwateteza moyo wanga pa tsiku lankhondo.

⁸Inu Chauta, musampatse munthu woipa zokhumba zake. Musathandizire chiwembu chake.

⁹Adani anga ondizinga asandigonjetse. Mau ao otemberera aŵabwerere.

¹⁰Makala amoto aŵagwere, aponyedwe m'maenje ozama, asatulukemonso.

¹¹Musalole kuti woononga mbiri ya mnzake akhazikike m'dziko. Choipa chimlondole munthu wankhanza mpaka kumuwononga.

¹²Ndimadziŵa kuti Inu Chauta mumateteza ozunzika, mumaweruza mwachilungamo anthu osoŵa.

¹³Zoonadi, anthu ochita zabwino adzatamanda dzina lanu. Anthu amenewo adzakhala pamaso panu.