Read Buku Loyera - Chichewa Mas. 141 Bible Online

Mas. 141 - Buku Loyera - Chichewa bible

Mas. 141

¹Salmo la Davide. Ndikukuitanani, Inu Chauta, fulumirani kudzandithandiza. Tcherani khutu kuti mumve liwu langa pamene ndikupemphera kwa Inu.

²Pemphero langa likwere kwa Inu ngati lubani, kukweza kwa manja anga kukhale ngati nsembe yamadzulo.

³Muike mlonda pakamwa panga, Inu Chauta. Mulonde pa khomo la milomo yanga.

⁴Musalole kuti mtima wanga upendekere ku zoipa, ndisadzipereke ku ntchito zoipa pamodzi ndi anthu ochita zoipa, ndisadye nawo maphwando ao.

⁵Munthu wolungama angathe kundimenya kapena kundidzudzula chifukwa andimvera chifundo, koma ndisalandire ulemu kwa anthu oipa, pakuti ndimapemphera motsutsana ndi ntchito zao zoipa.

⁶Anthu oipa akadzaperekedwa kwa oŵalanga, pamenepo adzaphunzira kuti mau a Chauta ndi oona.

⁷Monga momwe nkhuni zimamwazikira akaziŵaza, ndi m'menenso mafupa ao adzamwazikira ku manda.

⁸Koma maso anga amayang'anirabe kwa Inu, Chauta Mulungu wanga. Ndimathaŵira kwa Inu kuti munditeteze, musandisiye opanda wonditchinjiriza.

⁹Mundipulumutse ku msampha umene iwo anditchera, ndi ku makhwekhwe a anthu ochita zoipa.

¹⁰Anthu oipa akodwe pamodzi mu ukonde wao womwe, koma ine ndipulumuke.