Read Buku Loyera - Chichewa Mas. 142 Bible Online

Mas. 142 - Buku Loyera - Chichewa bible

Mas. 142

¹Ndakatulo ya Davide. Adainena ngati pemphero, pamene anali m'phanga. Ndikulirira Chauta mokweza, ndikupemba kwa Chauta mofuula.

²Ndikupereka madandaulo anga kwa Iye, ndikutchula mavuto anga pamaso pake.

³Pamene mtima wanga ufooka, Inu mumadziŵa zoti ndichite. Adani anditchera msampha m'njira imene ndimayendamo.

⁴Ndikayang'ana ku dzanja lamanja, palibe ndi mmodzi yemwe wosamalako za ine. Kulibe koti ndithaŵire, palibe munthu wondisamala.

⁵Ndimalirira Inu Chauta, ndimati, “Inu ndinu kothaŵira kwanga, ndinu zanga zonse m'dziko la amoyo.”

⁶Imvani kulira kwanga, pakuti ndataya mtima. Pulumutseni kwa ondizunza, chifukwa andiposa mphamvu.

⁷Tulutseni m'ndende kuti ndizitamanda dzina lanu. Anthu anu adzandizungulira, chifukwa Inu mwandichitira zabwino zambiri.