Read Buku Loyera - Chichewa Mas. 144 Bible Online

Mas. 144 - Buku Loyera - Chichewa bible

Mas. 144

¹Salmo la Davide. Atamandike Chauta, thanthwe langa londitchinjiriza, amene amaphunzitsa manja anga ndi zala zanga kumenya nkhondo.

²Ndiye thanthwe langa ndi tchemba langa londiteteza, ndiye linga langa londipulumutsa, ndiye chishango changa chothaŵirako. Amaika mitundu ya anthu mu ulamuliro wanga.

³ Inu Chauta, kodi munthu nchiyani, kuti muzimsamala? Mwana wa munthu nchiyani, kuti muzimganizira?

⁴Munthu ali ngati mpweya, masiku ake ali ngati mthunzi wosakhalitsa.

⁵Ng'ambani thambo, Inu Chauta, ndi kutsikira pansi. Khudzani mapiri kuti afuke nthunzi.

⁶Ng'animitsani zing'aning'ani ndi kuŵamwaza adani anga. Ponyani mivi yanu, ndi kuŵapirikitsa.

⁷Tambasulani dzanja lanu kuchokera kumwamba. Landitseni ndi kundipulumutsa ku madzi ozama, omboleni m'manja mwa akunja,

⁸amene amalankhula zabodza, ndipo amalumbira zonama.

⁹Ndidzakuimbirani nyimbo yatsopano, Inu Mulungu. Ndidzakuimbirani zeze wa nsambo khumi,

¹⁰Inu amene mumapambanitsa mafumu pankhondo, amene mumalanditsa Davide mtumiki wanu.

¹¹Landitseni kwa adani ankhalwe, mundipulumutse m'manja mwa akunja, amene amalankhula zabodza, ndipo amalumbira zonama.

¹²Ana athu aamuna pachinyamata pao akhale amphamvu ngati mitengo, ana athu aakazi akhale okongola ngati nsanamira zozokotedwa zapangodya, zoti zikometse nyumba yaufumu.

¹³Nkhokwe zathu zikhale zodzaza, zisunge zokolola za mtundu uliwonse. Nkhosa zathu zibale ana zikwizikwi m'mabusa athu.

¹⁴Ng'ombe zathu zikhale ndi maŵele, zisapoloze kapena kulephera kubereka. M'miseu mwathu musakhale kulira chifukwa cha mavuto.

¹⁵Ngodala anthu olandira madalitso ameneŵa. Ngodala anthu amene Mulungu wao ndi Chauta.