Read Buku Loyera - Chichewa Mas. 145 Bible Online

Mas. 145 - Buku Loyera - Chichewa bible

Mas. 145

¹Salmo la Davide. Ndidzakuyamikani, Inu Mulungu wanga, mfumu yanga, ndidzalemekeza dzina lanu nthaŵi zonse mpaka muyaya.

²Ndidzakuthokozani tsiku ndi tsiku, ndidzatamanda dzina lanu mpaka muyaya.

³Chauta ndi wamkulu ndi woyenera kumtamanda kwambiri, ndipo ukulu wake sitingathe kuumvetsa.

⁴Mibadwo ndi mibadwo idzatamanda ntchito zanu, idzalalika ntchito zanu zamphamvu.

⁵Ndidzasinkhasinkha za ulemerero ndi za ufumu wanu waukulu, ndidzalingalira za ntchito zanu zodabwitsa.

⁶Anthu adzasimba za mphamvu zanu zoopsa, inenso ndidzalalika za ukulu wanu.

⁷Adzasimba za ubwino wanu, adzaimba nyimbo zotamanda kulungama kwanu.

⁸Chauta ndi wokoma mtima ndi wachifundo, wosakwiya msanga, wodzaza ndi chikondi chosasinthika.

⁹Chauta ndi wabwino kwa onse, amachitira chifundo zamoyo zonse zimene adazilenga.

¹⁰Zamoyo zonse zidzakuthokozani, Inu Chauta, anthu anu onse oyera mtima adzakutamandani.

¹¹Adzalankhula za ulemerero wa ufumu wanu, adzasimba za mphamvu zanu,

¹²kuti adziŵitse anthu onse za ntchito zanu zamphamvu, kutinso asimbe za ulemerero ndi za ufumu wanu waukulu.

¹³Ufumu wanu ndi ufumu wamuyaya, ulamuliro wanu ndi wa pa mibadwo yonse. Chauta ndi wokhulupirika pa mau ake onse, ndi wokoma mtima pa zochita zake zonse.

¹⁴Chauta amachirikiza onse ogwa m'mavuto, amakweza onse otsitsidwa.

¹⁵Maso onse amayang'anira kwa Inu, ndipo mumaŵapatsa chakudya pa nthaŵi yake.

¹⁶Mumafumbatula dzanja lanu, ndipo mumapatsa chamoyo chilichonse zofuna zake.

¹⁷Chauta ndi wolungama m'zochita zake zonse, ndi wachifundo pa zonse zimene achita.

¹⁸Chauta ali pafupi ndi onse amene amamutama mopemba. Ali pafupi ndi onse amene amamutama mokhulupirika.

¹⁹Amene amamvera Chauta, amaŵapatsa zofuna zao, amamvanso kulira kwao, naŵapulumutsa.

²⁰Onse amene amakonda Chauta, amaŵasunga, koma Chauta adzaononga oipa onse.

²¹Pakamwa panga padzayamika Chauta, zamoyo zonse zitamande dzina lake loyera mpaka muyaya.