Read Buku Loyera - Chichewa Mas. 149 Bible Online

Mas. 149 - Buku Loyera - Chichewa bible

Mas. 149

¹Tamandani Chauta! Imbirani Chauta nyimbo yatsopano, imbani nyimbo yomtamanda pa msonkhano wa anthu ake oyera mtima.

²Aisraele asangalale ndi Mlengi wao. Anthu a Ziyoni akondwere ndi Mfumu yao.

³Atamande dzina lake povina, amuimbire nyimbo yokoma ndi ng'oma ndi pangwe.

⁴Paja Chauta amakondwera ndi anthu ake, amaŵalemekeza anthu odzichepetsa poŵagonjetsera adani ao.

⁵Okhulupirika akondwerere chigonjetso chopambanachi, aziimba mokondwa ali gone pa mabedi.

⁶Atamande Mulungu kwambiri mokweza mau, malupanga akuthwa konsekonse ali m'manja,

⁷kuti alipsire mafuko achikunja, kuti alange mitundu ina ya anthu.

⁸Amange mafumu ao ndi maunyolo, amange atsogoleri ao ndi zitsulo,

⁹kuti aŵalange monga momwe Mulungu adalamulira. Umenewu ndiwo ulemerero wa anthu okhulupirira Chauta. Tamandani Chauta!