Read Buku Loyera - Chichewa Mas. 16 Bible Online

Mas. 16 - Buku Loyera - Chichewa bible

Mas. 16

¹Salmo la Davide la mtundu wa Mikitamu. Mundisunge Inu Mulungu, pakuti ndikuthaŵira kwa Inu.

²Ndimamuuza Chauta kuti, “Inu ndinu Ambuye anga. Ndilibe chinthu china chabwino koma Inu nokha.”

³Kunena za oyera mtima amene ali pansi pano, ameneŵa ndi olemekezeka, ndipo ndimakondwera nawo.

⁴Amene amasankhula milungu ina, amadzichulukitsira mavuto. Sindidzatsira nawo nsembe zao zamagazi kapena kutchula maina a milungu yaoyo.

⁵Chauta ndiye chuma changa ndi choloŵa changa. Tsogolo langa lili m'manja mwanu.

⁶Malire a malo anga andikhalira mwabwino. Inde, ndalandira madalitso abwino ndithu.

⁷Ndikutamanda Chauta amene ali phungu wanga. Mtima wanga umandilangiza ndi usiku womwe.

⁸Nthaŵi zonse ndimalingalira za Chauta. Popeza kuti ali ku dzanja langa lamanja, palibe amene angandiopse konse.

⁹Nchifukwa chake mtima wanga ukukondwa, ndipo m'katikati mwangamu ndikusangalala. Thupi langanso lidzakhala pabwino,

¹⁰ chifukwa simudzandisiya ku malo a anthu akufa, simudzalola kuti wokondedwa wanune ndikaole kumeneko.

¹¹Mumandiwonetsa njira ya ku moyo. Ndimapeza chimwemwe chachikulu kumene kuli Inu, ndidzasangalala mpaka muyaya ku dzanja lanu lamanja.