Read Buku Loyera - Chichewa Mas. 17 Bible Online

Mas. 17 - Buku Loyera - Chichewa bible

Mas. 17

¹Pemphero la Davide. Inu Chauta, imvani pemphero la ine munthu wolungama, imvani kupemba kwanga. Tcherani khutu kuti mumve mau ochokera kwa ine, munthu wosanyengane.

²Kusalakwa kwanga kuwonekere poyera pa chiweruzo chanu, maso anu aone kulungama kwanga.

³Ngakhale muyese mtima wanga, kapena kundipenyetsetsa usiku, kaya mundiyang'anitsitse chotani, mudzapeza kuti ndilibe mlandu. Pakamwa panga sipalankhula zoipa.

⁴Kunena za ntchito za anthu, ine posunga mau anu, sindidatsate za anthu andeu.

⁵Ndayenda m'njira zanu nthaŵi zonse, sindidapatuke konse.

⁶Ndikupemphera kwa Inu Mulungu, chifukwa mudzandiyankha. Tcherani khutu kuti mumve mau anga.

⁷Onetsani chifundo chanu pakuchita zodabwitsa, Inu amene mumaŵapulumutsa ndi dzanja lanu lamanja onse obwera kwa Inu, kuthaŵa adani ao.

⁸Mundisunge ngati mwana wa diso, munditeteze pansi pa mapiko anu,

⁹kuti asandiwone anthu oipa ofuna kupasula, ndiye kuti adani anga oopsaŵa amene akundizinga.

¹⁰Mitima yao ilibe chifundo, amalankhula modzikuza.

¹¹Amangondilondola ndi kundizinga. Amandiyang'ana kuti apeze njira yondigwetsera pansi.

¹²Ali ngati mkango wofunitsitsa kuti ukadzule, ngati chilombo cholusa cholalira.

¹³Dzambatukani, Inu Chauta, mukumane nawo ndi kuŵagonjetsa. Mundipulumutse ndi lupanga lanu kwa anthu oipawo.

¹⁴Inu Chauta, ndi dzanja lanu mundilanditse kwa adani, kwa anthu amene moyo wao umangosamala zapansipano. Muŵalange ndi zoŵaŵa zimene mudaŵasungira. Nawonso ana awo akhale nazo zambiri, ndipo iwowo asiyireko ana aonso.

¹⁵Koma ine m'kulungama kwanga ndidzaona nkhope yanu. Tsono ine nditadzuka, ndidzakondwa kotheratu poonana ndi Inu.