Read Buku Loyera - Chichewa Mas. 18 Bible Online

Mas. 18 - Buku Loyera - Chichewa bible

Mas. 18

¹Kwa Woimbitsa Nyimbo. Salmo la Davide, mtumiki wa Chauta. Nyimbo imeneyi adaimbira Chauta, atampulumutsa kwa adani ake onse, makamaka kwa Saulo. Adati: Ndimakukondani Chauta, Inu mphamvu zanga.

²Chauta ndiye thanthwe langa, linga langa ndi mpulumutsi wanga. Ndiye Mulungu wanga, ndi thanthwe langa limene ndimathaŵirako. Ndiye chishango changa, ndiye mtetezi wanga ndi mpulumutsi wanga, ndiye linga langa.

³Ndimaitana Chauta, amene ayenera kumtamanda, ndipo amandipulumutsa kwa adani anga.

⁴Nthambo za imfa zidandizungulira, mitsinje yothamanga yoononga idandisefukira.

⁵Nthambo zakumanda zidandizeŵeza, misampha ya imfa idandikola.

⁶Ndidaitana Chauta m'zovuta zanga. Ndidafuulira Mulungu wanga kuti andithandize. Iye ali m'Nyumba mwake, adamva liwu langa, kulira kwanga kofuna chithandizo kudamveka kwa iye.

⁷Pamenepo dziko lapansi lidanjenjemera ndi kuchita chivomezi. Maziko a mapiri nawonso adanjenjemera ndi kugwedezeka, chifukwa Iye adaakalipa.

⁸M'mphuno mwake munkafuka utsi, m'kamwa mwake munkatuluka moto woononga, makala amoto anali laŵilaŵi kuchokera m'kamwa momwemo.

⁹Adang'amba thambo natsika pansi, mdima wabii unali ku mapazi ake.

¹⁰Adakwera pa mkerubi nauluka. Adayenda mwaliŵiro ndi mphepo.

¹¹Mdima adausandutsa chofunda chake, mitambo yakuda yamvula adaisandutsa mwafuli wake.

¹²M'kuŵala kumene kunali pamaso pake, munkafumira matalala ndi makala amoto, amene adabzola mitambo yophimba ija.

¹³Kumwamba Chauta adagunda ngati bingu, Wopambanazonse liwu lake lidamveka m'kati mwa matalala ndi makala amoto.

¹⁴Adaponya mivi yake nabalalitsa adani ake, adachititsa zing'aning'ani, naŵapirikitsa.

¹⁵Ngalande zozama zam'nyanja zidaonekera, maziko a dziko lapansi adakhala poyera, pamene Inu Chauta mudakhuluma mokalipa, pamene mudatulutsa mpweya wamphamvu m'mphuno mwanu.

¹⁶Ali kumwamba Chauta adatambalitsa dzanja nandigwira, ndi kundivuula m'madzi ozama.

¹⁷Adandipulumutsa kwa adani anga amphamvu, kwa onse amene ankadana nane, pakuti iwo anali amphamvu kwambiri kupambana ine.

¹⁸Adaniwo adandithira nkhondo pamene ndinali m'mavuto, koma Chauta adandichirikiza.

¹⁹Adakandifikitsa ku malo amtendere, adandipulumutsa chifukwa adakondwera nane.

²⁰Chauta adandipatsa mphotho molingana ndi ntchito zanga zabwino, adandifupa molingana ndi ungwiro wanga.

²¹Ine ndidatsata njira za Chauta, sindidachite zoipa ndi kumsiya Mulungu wanga.

²²Ndidamvera malangizo ake onse, ndipo malamulo ake sindidaŵataye.

²³Ndinalibe mlandu pamaso pake, ndinkalewa zoipa m'moyo mwanga.

²⁴Nchifukwa chake Chauta wandipatsa mphotho molingana ndi ntchito zanga zabwino, monga momwe akuwonera kuti ndilibe mlandu.

²⁵Kwa anthu okhulupirika, Inu Mulungu mumadziwonetsa okhulupirika. Kwa anthu aungwiro, mumadziwonetsa abwino kotheratu.

²⁶Kwa anthu oyera mtima mumadziwonetsa okoma mtima, koma kwa anthu oipa mtima, mumawonetsa kunyansidwa nawo.

²⁷Paja anthu odzichepetsa, Inu mumaŵapulumutsa, koma anthu odzikuza mumaŵatsitsa.

²⁸Ndithu, Inu mumayatsa nyale ya moyo wanga. Chauta, Mulungu wanga, amandiwunikira mu mdima.

²⁹Ndi chithandizo chanu ndingathe kugonjetsa gulu la ankhondo. Ndi chithangato cha Mulungu, ndingathe kupambana.

³⁰Mulungu wathuyo, zochita zake nzangwiro, mau ake sapita pachabe, Iye ndiye chishango choteteza onse othaŵira kwa Iye.

³¹Palibe mulungu wina koma Chauta yekha. Palibe thanthwe lina lothaŵirapo koma Mulungu wathu yekha.

³²Mulungu wathu ndiye amene amandiveka mphamvu, wandichotsera zoopsa m'njira zanga.

³³ Amalimbitsa miyendo yanga ngati ya mbaŵala, ndipo amandisunga bwino m'mapiri.

³⁴Amaphunzitsa manja anga kamenyedwe ka nkhondo, kotero kuti ndingathe kupinda uta wachitsulo.

³⁵Inu mwanditchinjiriza ndi chishango chanu chachipulumutso. Dzanja lanu lamanja landichirikiza, mwandikweza ndi chithandizo chanu.

³⁶Mudandikuzira njira yanga kuti ndiyendemo bwino, choncho mapazi anga sadaterereke.

³⁷Ndidalondola adani anga ndi kuŵapeza, sindidabwerere mpaka nditaŵagonjetsa.

³⁸Ndimaŵakantha koopsa kotero kuti sangathenso kudzuka, ndidaŵapondereza ndi mapazi anga.

³⁹Paja ndinu mudandipatsa mphamvu zomenyera nkhondo, ndinu mudandigonjetsera anthu ondiwukira.

⁴⁰Inu mudapirikitsa adani anga kuti andithaŵe, amene ankadana nane ndidaŵaononga.

⁴¹Adakuwa kuti ena aŵathandize, koma panalibe woŵapulumutsa. Adalirira Chauta, koma sadaŵayankhe.

⁴²Ndidaŵaperapera ngati fumbi louluka ndi mphepo. Ndimaŵapondereza ngati matope amumseu.

⁴³Inu mudandipulumutsa kwa anthu olimbana nane, Inu mudandisandutsa mfumu ya mitundu yonse. Choncho anthu osaŵadziŵa ankanditumikira.

⁴⁴Atangomva za ine adayamba kundimvera, anthu a maiko ena adabwera kwa ine kudzapemba.

⁴⁵Anthu a mitundu ina adataya mtima, adatuluka m'malinga mwao ali njenjenje.

⁴⁶Chauta ndi wamoyo. Litamandike thanthwe langa, alemekezeke Mulungu wondipulumutsa,

⁴⁷Mulungu ndiye adandithandiza kuti ndilipsire, adagonjetsa anthu a mitundu ina, kuti akhale mu ulamuliro wanga.

⁴⁸Ndiye amene adandipulumutsa kwa adani anga. Zoonadi Inu mudandikweza pamwamba pa ondiwukira, mudandilanditsa kwa anthu ankhanza.

⁴⁹Chifukwa cha zimenezi ndidzakutamandani Inu Chauta, pakati pa mitundu ya anthu, ndidzaimba nyimbo zotamanda dzina lanu.

⁵⁰Mulungu amathandiza mfumu yake, kuti izipambana nthaŵi ndi nthaŵi. Amaonetsa chikondi chake chosasinthika kwa wodzozedwa wake, ndiye kuti kwa Davide ndi kwa zidzukulu zake mpaka muyaya.