Read Buku Loyera - Chichewa Mas. 21 Bible Online

Mas. 21 - Buku Loyera - Chichewa bible

Mas. 21

¹Kwa Woimbitsa Nyimbo. Salmo la Davide. Mfumu ikusangalala chifukwa mwaipatsa mphamvu, Inu Chauta, ikukondwa kwambiri chifukwa mwaipambanitsa ndinu.

²Mwaipatsa zimene mtima wake umakhumba, simudaimane zimene pakamwa pake padapempha.

³Mumafika kwa mfumuyo ndi madalitso okoma kwambiri. Mwaiveka chipewa chaufumu chagolide pamutu.

⁴Iyo idakupemphani moyo, ndipo Inu mudaipatsa moyo wautali, wamuyaya.

⁵Ulemerero wake ndi waukulu chifukwa mwaipambanitsa ndinu. Mwaipatsa ufumu waukulu ndi waulemu.

⁶Zoonadi, mwaisandutsa yodala kopambana mpaka muyaya. Mwaisangalatsa ndi chimwemwe, chifukwa muli nayo.

⁷Paja mfumuyo imakhulupirira Chauta, ndipo siidzagwedezeka chifukwa cha chikondi chosasinthika cha Wopambanazonse.

⁸Idzagonjetsa adani ake onse. Dzanja lake lamphamvu lidzakantha onse odana nayo.

⁹Ikangotulukira, idzaŵaononga monga m'mene ng'anjo yamoto imaonongera. Chauta adzaŵatha phu, chifukwa cha kukwiya nawo, ndipo iwo adzanyeka ndi moto kuchita kuti psiti.

¹⁰Mfumuyo idzaononga ana ao pa dziko lapansi, zidzukulu zao zidzatha pakati pa anthu.

¹¹Akafuna kuti aichite choipa ndi kuipweteka, adzalephereratu,

¹²pakuti idzaŵapirikitsa potendekera nkhope zao ndi mauta ake.

¹³Mutamandike, Inu Chauta, chifukwa cha kupambana kwanu. Tidzaimba ndi kuyamika mphamvu zanu zazikulu.