Read Buku Loyera - Chichewa Mas. 22 Bible Online

Mas. 22 - Buku Loyera - Chichewa bible

Mas. 22

¹Kwa Woimbitsa Nyimbo. Kutsata maimbidwe a nyimbo yoti: Mbaŵala ya M'maŵa. Mulungu wanga, Mulungu wanga, mwandisiyiranji? Chifukwa chiyani simukundithandiza mpang'ono pomwe, chifukwa chiyani simukumva mau a kubuula kwanga?

²Mulungu wanga, ine ndimalira usana, koma Inu simundiyankha, ndimalira usiku, koma sindipeza mpumulo.

³Komabe Inu ndinu oyera, mumakhala pa mpando wanu waufumu, ndipo anthu anu Aisraele amakutamandani.

⁴Makolo athu ankadalira Inu. Zoonadi, ankakhulupirira Inu, ndipo Inu munkaŵapulumutsa.

⁵Ankalirira Inu, ndipo Inu munkaŵalanditsa. Ankakhulupirira Inu, ndipo Inu simunkaŵagwiritsa mwala.

⁶Koma ine ndine nyongolotsi, sindine munthu konse, ndine amene anthu onse amandinyodola ndi kundinyoza.

⁷ Onse ondiwona amandiseka, amandikwenzulira ndi kupukusa mitu yao.

⁸ Amati, “Unkadalira Chauta, Chauta yemweyo akupulumutse. Akulanditsetu tsono, popeza kuti amakukonda.”

⁹Komabe Inu ndinu amene mudalola kuti ndibadwe. Inu ndinu chikhulupiriro changa, mudandilera bwino ndili mwana woyamwa.

¹⁰Ndakhala ndikudalira Inu chibadwire changa, Inu mwakhala Mulungu wanga kuyambira pamene mai wanga adandibala.

¹¹Musandikhalire kutali, pakuti mavuto ali pafupi kundigwera, ndipo palibe wina wondithandiza.

¹²Nkhunzi zambiri zandizungulira. Adani amphamvu ngati nkhunzi za ku Basani andizinga.

¹³Andiyasamira kukamwa, ngati mkango wobangula wofuna kundikadzula.

¹⁴Moyo wanga watayika ngati madzi, mafupa anga aweyeseka. Mtima wanga uli ngati sera, wasungunuka m'kati mwanga.

¹⁵Kukhosi kwanga kwauma ngati phale, lilime langa lakangamira ku nsagwada. Inu mwandisiya pa fumbi kuti ndifere pomwepo.

¹⁶Anthu ankhanza andizinga ngati mimbulu. Aboola manja anga ndi mapazi anga.

¹⁷Mafupa anga akuwonekera, koma anthu aja akungondiyang'anitsitsa akukondwera poona kuti ndikuvutika.

¹⁸Agaŵana zovala zanga, ndipo achitira malaya anga maere.

¹⁹Koma Inu Chauta musakhale kutali. Inu, mphamvu zanga, fulumirani kudzandithandiza.

²⁰Pulumutsani moyo wanga ku lupanga. Landitseni ku mphamvu za mimbulu.

²¹Pulumutseni kukamwa kwa mkango, mulanditse moyo wanga wovutika ku nyanga za njati.

²² Ndidzasimbira abale anga za dzina lanu. Ndidzatamanda dzina lanu pa msonkhano wa anthu anu.

²³Ndidzati, “Inu omvera Chauta, mtamandeni Iye. Inu nonse ana a Yakobe mlemekezeni Iye, inu nonse ana a Israele, mchitireni Iye ulemu.

²⁴“Pakuti sadanyoze munthu wozunzika, sadaipidwe ndi masautso ake, sadamubisire nkhope yake, koma adamumvera pamene adamdandaulira.”

²⁵Ndidzakutamandani pa msonkhano waukulu chifukwa cha zimene mwandichitira. Zimene ndidalonjeza ndidzazichita pamaso pa onse okumverani.

²⁶Ozunzika adzadya ndi kukhuta, ofunafuna Chauta adzamtamanda. Ine ndidzati, “Mitima yanu ikhale ndi moyo nthaŵi zonse.”

²⁷Anthu a mitundu yonse pa dziko lapansi adzakumbukira nadzatembenukira kwa Chauta, mabanja a mitundu ina ya anthu adzampembedza.

²⁸Pakuti ulamuliro ndi wake wa Chauta, Iye amalamula anthu a mitundu yonse.

²⁹Anthu onse odzitama adzamuŵeramira. Anthu onse oloŵa m'manda nawonso adzamugwadira, ndiye kuti onse osatha kudzisungira moyo.

³⁰Zidzukulu zam'tsogolo zidzatumikira Ambuye. Anthu adzauza mbadwo umene ukudzawo za Iye.

³¹Adzalalika za chipulumutso chake kwa anthu amene mpaka tsopano sanabadwe, ponena kuti Chauta ndiye adapulumutsa anthu ake.