Read Buku Loyera - Chichewa Mas. 26 Bible Online

Mas. 26 - Buku Loyera - Chichewa bible

Mas. 26

¹Salmo la Davide. Inu Chauta, onetsani kuti ine ndine wosalakwa, pakuti ndimachita zolungama, ndipo ndakhulupirira Inu mosakayika konse.

²Mundiyang'anitsitse, Inu Chauta, ndi kundiyesa. Muwone mtima wanga pamodzi ndi maganizo anga.

³Chikondi chanu chimanditsogolera, ndipo ndimakhala wokhulupirika kwa Inu.

⁴Sindikhala pamodzi ndi anthu onyenga, sindiyenda ndi anthu achiphamaso.

⁵Ndimadana ndi anthu ochita zoipa, sindikhala pamodzi ndi anthu oipa.

⁶Ndimasamba m'manja kuwonetsa kuti sindidachimwe, ndimakupembedzani pa guwa lanu lansembe, Inu Chauta.

⁷Ndimaimba molimbika nyimbo yothokozera, ndimalalika ntchito zanu zonse zodabwitsa.

⁸Inu Chauta, ndimakonda Nyumba imene mumakhalamo, ndiye kuti malo amene kuli ulemerero wanu.

⁹Musanditayire kumodzi ndi anthu ochimwa, musandichotsere moyo pamodzi ndi anthu ofuna kupha anzao,

¹⁰anthu amene manja ao amachita zoipa, ndipo anthu amene dzanja lao lamanja ndi lodzaza ndi ziphuphu.

¹¹Koma ine ndimayenda mokhulupirika, mundikomere mtima ndipo mundipulumutse.

¹²Ndili wokhazikika pa malo opanda zovuta, ndipo ndidzatamanda Chauta pa msonkhano waukulu.