Read Buku Loyera - Chichewa Mas. 33 Bible Online

Mas. 33 - Buku Loyera - Chichewa bible

Mas. 33

¹Kondwerani mwa Chauta, inu anthu ake. Zoonadi ochita zolungama azitamanda.

²Tamandani Chauta ndi pangwe. Muimbireni nyimbo ndi zeze wa nsambo khumi.

³Muimbireni nyimbo yatsopano, kodolani nsambozo mwaluso ndi kufuula mosangalala.

⁴Mau a Chauta ndi olungama, zochita zake zonse amazichita mokhulupirika.

⁵Iye amachita zolungama ndi kuweruza mosakondera. Amaonetsa chikondi chosasinthika pa dziko lonse lapansi.

⁶Chauta adalankhula ndipo zakumwamba zidalengedwa. Zonse zakumeneko zidalengedwa pamene Iye adalankhula mau ake.

⁷Adasonkhanitsa pamodzi madzi a m'nyanja zakuya ndipo adaziikira malire kuti zisasefukire.

⁸Dziko lonse lapansi liwope Chauta. Anthu onse okhala pa dziko lapansi achite naye mantha,

⁹pakuti Iye adalankhula, ndipo zidachitikadi, adalamula, ndipo zidaonekadi.

¹⁰Zolinga za anthu akunja Chauta amazisandutsa zopandapake. Maganizo ao onse amaŵasandutsa achabechabe.

¹¹Koma zolinga za Chauta zimachitika nthaŵi zonse, maganizo a mumtima mwake amakhazikika mpaka muyaya.

¹²Ngwodala mtundu wa anthu amene Mulungu wao ndi Chauta, anthu amene Chauta waŵasankha akeake.

¹³Chauta ali kumwamba, amayang'ana pansi ndi kuwona anthu onse.

¹⁴Kumene amakhala pa mpando wachifumuko, amapenya anthu onse okhala pa dziko lapansi

¹⁵Amene amapanga mitima ya anthu onse, ndiye amene amapenya ntchito zao zonse.

¹⁶ Mfumu siipulumuka chifukwa cha kukula kwa gulu lake la ankhondo. Wankhondo sapulumuka chifukwa chakuti ali ndi mphamvu zambiri.

¹⁷Pa kavalo wankhondo sungaikepo mtima kuti upambane, chifukwa sangathe kupulumutsa munthu, ngakhale kavaloyo ali ndi mphamvu zambiri.

¹⁸Chauta amayang'ana anthu omumvera, ndi odalira chikondi chake chosasinthika.

¹⁹Iye amachita izi kuti aŵapulumutse ku imfa ndi kuŵasungira moyo anthuwo pa nthaŵi ya njala.

²⁰Mitima yathu ikuyembekeza Chauta, chifukwa Iye ndiye chithandizo ndi chishango chathu.

²¹Mitima yathu imasangalala mwa Chauta, popeza kuti timadalira dzina lake loyera.

²²Inu Chauta, chikondi chanu chosasinthika chikhale pa ife, chifukwa timakhulupirira Inu.