Read Buku Loyera - Chichewa Mas. 34 Bible Online

Mas. 34 - Buku Loyera - Chichewa bible

Mas. 34

¹Salmo la Davide. Anali atanyengezera kukhala ngati wamisala pamaso pa Abimeleki. Pamenepo nkuti Abimelekiyo atapirikitsa Davide. Ndidzayamika Chauta nthaŵi zonse, pakamwa panga padzatamanda Iye kosalekeza.

²Moyo wanga umanyadira Chauta. Anthu ozunzika amve ndipo akondwere.

³Lalikani pamodzi nane ukulu wa Chauta, tiyeni limodzi tiyamike dzina lake.

⁴Ndidapemphera kwa Chauta ndipo adandiyankha. Adandipulumutsa kwa zonse zimene ndinkaziwopa.

⁵Ozunzikawo atayang'ana kwa Chauta, nkhope zao zidasangalala, sadachite manyazi.

⁶Munthu wosaukayu adalira, ndipo Chauta adamumva, nampulumutsa m'mavuto ake onse.

⁷Mngelo wa Chauta amatchinjiriza anthu omvera Iye, ndipo amaŵapulumutsa.

⁸Yesani ndipo mudzaona kuti Chauta ndi wabwino. Ngwodala munthu wothaŵira kwa Chauta.

⁹Muzimvera Chauta, inu anthu ake oyera mtima, pakuti amene amamumvera sasoŵa kanthu.

¹⁰Ngakhale anaamkango amasoŵa chakudya ndipo amakhala anjala, koma anthu amene amalakalaka Chauta, sasoŵa zinthu zabwino.

¹¹Bwerani ana anga, mundimvere, ndidzakuphunzitsani kuwopa Chauta.

¹²Ndani mwa inu amakhumba moyo ndi kulakalaka kuti akhale masiku ambiri, kuti asangalale ndi zinthu zabwino?

¹³Ngati ufunadi moyo, usalankhule zoipa, pakamwa pako pasakambe zonyenga.

¹⁴Lewa zoipa, ndipo uchite zabwino. Funafuna mtendere ndi kuulondola.

¹⁵Ngati mumvera Chauta, adzakuyang'anirani ndipo adzayankha kupempha kwanu.

¹⁶Koma Chauta amaŵakwiyira anthu ochita zoipa, anthuwo sadzakumbukikanso pansi pano.

¹⁷Pamene anthu ake akulira kuti aŵathandize, Chauta amamva naŵapulumutsa m'mavuto ao onse.

¹⁸Chauta amakhala pafupi ndi anthu a mtima wosweka, amapulumutsa otaya mtima.

¹⁹Anthu a Mulungu amaona masautso ambiri. Komabe Chauta amawapulumutsa m'mavuto awo onse.

²⁰Chauta amasunga thupi la munthuyo, palibe fupa limene limasweka.

²¹Choipa chitsata mwini, anthu odana ndi munthu wa Mulungu adzalangidwa.

²²Chauta amaombola moyo wa atumiki ake. Palibe wothaŵira kwa Iye amene adzalangidwe.