Read Buku Loyera - Chichewa Mas. 35 Bible Online

Mas. 35 - Buku Loyera - Chichewa bible

Mas. 35

¹Salmo la Davide. Inu Chauta, mulimbane nawo anthu olimbana nane, Mumenyane nawo omenyana nane.

²Gwirani chishango ndi lihawo, ndipo fulumirani mundithandize.

³Tengani mkondo ndi nthungo, kuti mulimbane nawo anthu ondilondola. Uzani mtima wanga kuti, “Mpulumutsi wako ndine.”

⁴Anyozeke ndi kuchita manyazi onse ofunafuna moyo wanga. Abwezeni m'mbuyo ndipo athaŵe chinambalala amene apangana kuti andichite choipa.

⁵Akhale ngati mankhusu ouluka ndi mphepo, pamene mngelo wa Chauta akuŵapirikitsa.

⁶Njira yao ikhale yamdima ndi yoterera, pamene mngelo wa Chauta akuŵalondola.

⁷Adaniwo adanditchera ukonde popanda chifukwa, adandikumbira mbuna ine munthu wosachimwa.

⁸Aonongeke pamene iwo sakuyembekeza. Akodwe mu ukonde wotcha okha, agwere m'mbuna yokumba iwo omwe.

⁹Motero mtima wanga udzakondwa motamanda Chauta, kukondwerera kuti wandipulumutsa.

¹⁰Ndidzasangalala ndi mtima wonse ndi kunena kuti. “Ndani angafanefane ndi Inu Chauta, Inu amene mumapulumutsa munthu wofooka kwa munthu wopambana pa mphamvu, Inu amene mumapulumutsa munthu wofooka ndi wosoŵa kwa munthu wolanda zinthu zake?”

¹¹Mboni zoipa zikundiwukira, zikundifunsa zinthu zimene sindikuzidziŵa.

¹²Zikundibwezera zoipa pa zabwino, ndipo mtima wanga uli ndi chisoni chokhachokha.

¹³Koma ine pamene adani anga analikudwala, ndidavala chiguduli kuwonetsa chisoni. Ndidadzilanga posala zakudya. Ndidapemphera nditaŵeramitsa mutu wanga pa chifuŵa,

¹⁴monga ngati ndikuchitira chisoni bwenzi langa kapena mbale wanga. Ndinkayenda khumakhuma ngati munthu wolira maliro a mai wake, nditaŵerama ndi kumalira.

¹⁵Koma ine nditagwa m'mavuto, iwo aja adasonkhana akusangalala. Adandisonkhanira onse pamodzi, anthu achabechabe amene sindidaŵadziŵe nkomwe, ndipo ankangondisinjirira.

¹⁶Anthuwo ankapitirira kundinyodola mwachipongwe, namandikukutira mano ao.

¹⁷Inu Chauta, mudzakhala mpaka liti mukungoyang'ana? Landitseni kwa anthu ofuna kundiwononga, mupulumutse moyo wanga ku mikangoyi.

¹⁸Tsono ndidzakuthokozani pa msonkhano waukulu, ndidzakutamandani pa chinamtindi cha anthu anu.

¹⁹Musalole kuti adani anga onyenga akondwere chifukwa cha mavuto anga, musalole kuti amene amandida popanda chifukwa, andiyang'ane cham'mbali mondinyoza.

²⁰Iwo salankhula za mtendere, koma amangoganiza zonamizira okonda za mtendere pa dziko.

²¹Amandiseka mofuula namanena kuti, “Ha! Maso athu apenyadi zimene zidachitikazo.”

²²Inu Chauta, amene mwaona zimenezi, musakhale chete. Musakhale kutali ndi ine, Inu Ambuye.

²³Tiyeni, Inu Chauta, dzukani kuti munditchinjirize pa mlandu wanga, Inu Mulungu wanga ndi Ambuye anga.

²⁴Chauta, Mulungu wanga, chifukwa cha kulungama kwanu, onetsani kuti ine ndine wosalakwa, ndipo musalole kuti adani anga akondwere chifukwa cha mavuto anga.

²⁵Musalole kuti mumtima mwao anene kuti, “Inde, ndizo zimene timafuna.” Asanene kuti, “Tamgonjetsa.”

²⁶Amene amakondwera poona kuti ndili pa mavuto, muŵachititse manyazi, muŵasokoneze kwathunthu. Amene amayesa kuti akupambana ine, achite manyazi ndipo anyozeke.

²⁷Koma amene amafunitsitsa kuti ndipezeke wosalakwa, afuule ndi chimwemwe ndipo asangalale. Anene nthaŵi zonse kuti, “Chauta ndi wamkulu. Amakondwera akaona mtumiki wake zamuyendera bwino.”

²⁸Tsono nanenso ndidzalalika za kulungama kwanu. Ndidzakutamandani masiku onse, Inu Chauta.