Read Buku Loyera - Chichewa Mas. 38 Bible Online

Mas. 38 - Buku Loyera - Chichewa bible

Mas. 38

¹Salmo la Davide la chikumbutso. Inu Chauta musandikwiyire ndi kundidzudzula. Musapse mtima ndi kundilanga.

²Mivi yanu yandilasa, ndipo dzanja lanu landipsinja.

³Thupi langa lilibe mphamvu chifukwa cha ukali wanu. M'nkhongono mwanga mwalobodoka chifukwa cha uchimo wanga.

⁴Machimo anga andimiza msinkhu, akundilemera ngati katundu woposa mphamvu zanga.

⁵Mabala anga aola ndipo akununkha chifukwa cha kupusa kwanga.

⁶Ndapindika msana kwathunthu, ndaŵerama zedi, ndatha mphamvu, tsiku lonse ndimangonka ndilira.

⁷Thupi langa likutentha kwambiri ndi malungo, ndipo lilibe nyonga.

⁸Ndatheratu, ndipo ndatswanyika. Ndikubuula chifukwa cha kuvutika mu mtima.

⁹Ambuye, mumadziŵa zonse zimene ndimakhumba, kusisima kwanga sikuli kosamveka kwa Inu.

¹⁰Mtima wanga ukugunda, mphamvu zandithera, ndipo sindikutha kupenya bwino.

¹¹Abwenzi anga ndi anzanga omwe amandiimira kutali, chifukwa cha matenda anga. Achibale anga nawonso amandipewa.

¹²Anthu ofunafuna moyo wanga, amanditchera misampha. Ofuna kundipweteka amalankhula zondiwononga, tsiku lonse amangolingalira zondichita chiwembu.

¹³Koma ine ndili ngati gonthi, sindikumvako, ndili ngati mbeŵeŵe amene satha kulankhula.

¹⁴Inde ndili ngati munthu amene saamva, chifukwa sindingathe kuyankhapo kanthu, pamene akundilankhula.

¹⁵Koma tsono ndimayembekezera Inu Chauta, Ndinu Chauta, Mulungu wanga amene mudzayankha.

¹⁶Popeza ndimapemphera kuti, “Musalole konse kuti akondwerere pa ine, amene amandinyodola akaona kuti ndikuterereka.”

¹⁷Inde, ndili pafupi kugwa, ndipo ndikumva kuŵaŵa nthaŵi zonse.

¹⁸Ndikuvomera kuipa kwanga, ndikuda nkhaŵa chifukwa cha machimo anga.

¹⁹Ngamphamvu adani amene amafuna moyo wanga, ngambiri amene amandida popanda chifukwa.

²⁰Anthu amene amandibwezera zoipa m'malo mwa zabwino ndiwo adani anga, chifukwa ine ndimachita zabwino.

²¹Musandisiye ndekha, Inu Chauta, Inu Mulungu wanga, musakhale nane kutali.

²²Fulumirani kudzandithandiza, Inu Ambuye, Mpulumutsi wanga.