Read Buku Loyera - Chichewa Mas. 39 Bible Online

Mas. 39 - Buku Loyera - Chichewa bible

Mas. 39

¹Kwa Woimbitsa Nyimbo. Kutsata maimbidwe a Yedutuni. Salmo la Davide. Ndidati, “Ndidzasamala zochita zanga, kuti ndisachimwe polankhula. Ndidzatseka pakamwa panga nthaŵi zonse pamene anthu oipa ali nane.”

²Motero ndidakhala chete osalankhula kanthu, ndidakhala duu, koma popanda phindu, chifukwa mavuto anga ankangokulirakulira.

³Mtima wanga udavutika, ndipo pamene ndidasinkhasinkha, mtima wanga udangoyaka moto. Pompo ndidalankhula ndi mau akuti,

⁴“Inu Chauta, mundidziŵitse mathero a moyo wanga, mundidziŵitse kuchepa kwa masiku anga. Mundilangize kuti moyo wanga sukhalira kutha.

⁵“Onani, mwandipatsa masiku ochepa chabe, nthaŵi ya moyo wanga siili kanthu pamaso panu. Ndithudi, munthu aliyense ndi mpweya chabe.

⁶Zoonadi, munthu amayenda ngati chithunzithunzi, amangovutika ndi zachabechabe. Munthu amakundika chuma, koma amene adzachidye ndi wosadziŵika.

⁷“Nanga tsopano, Inu Ambuye, ndikudikira chiyani? Chikhulupiriro changa chili pa Inu.

⁸Pulumutseni ku zolakwa zanga zonse. Musandisandutse chinthu chochinyodola zitsiru.

⁹Ndine mbeŵeŵe, sinditsekula pakamwa panga, pakuti ndinu amene mwachita zimenezi.

¹⁰“Chotsani chikoti chanu pa ine, ndatheratu chifukwa cha mkwapulo wanu.

¹¹Inu mumalanga munthu pakumdzudzula chifukwa cha uchimo wake. Mumaonongeratu zimene iye amazikonda, monga m'mene chimachitira chifukufuku. Zoonadi, munthu aliyense ndi mpweya chabe.

¹²“Mverani pemphero langa, Inu Chauta, mumve kulira kwanga. Musakhale chete pamene ndikulirira Inu. Ndine mlendo wanu wosakhalitsa, munthu wongokhala nawo monga adaachitira makolo anga onse.

¹³Musandiyang'ane mwaukali, choncho ndidzatha kusangalala, ndisanafe ndi kuzimirira.”