Read Buku Loyera - Chichewa Mas. 41 Bible Online

Mas. 41 - Buku Loyera - Chichewa bible

Mas. 41

¹Kwa Woimbitsa Nyimbo. Salmo la Davide. Ngwodala munthu amene amaganizirako za amphaŵi, popeza kuti Chauta adzapulumutsa munthu wotere pa tsiku lamavuto.

²Chauta adzamteteza ndi kumsunga ndi moyo. Adzatchedwa wodala pa dziko. Chauta sadzampereka kwa adani ake, kuti amchite zimene iwo akufuna.

³Chauta adzamthandiza munthuyo akamadwala. Adzamchiritsa matenda ake onse.

⁴Tsono ndidati, “Inu Chauta, ndakuchimwirani, mundikomere mtima, muchiritse moyo wanga.”

⁵Koma adani anga ondifunira zoipa, amati, “Kodi munthu ameneyu adzafa liti, kuti aiŵalike?”

⁶Amene amabwera kudzandiwona, ndi wosakhulupirika, mumtima mwake amaganiza zoipa za ine, ndipo akatuluka, amakaziwanditsa.

⁷Onse odana nane amanong'onezana za ine, amayesa kuti zoipa zandigwera chifukwa cha kuipa kwanga.

⁸Amati, “Yamgwera nthenda yofa nayo, sadzukanso pamene wagonapo.”

⁹Ngakhalenso bwenzi langa lapamtima amene ndinkamkhulupirira, amene ankadya nane pamodzi, wandiwukira.

¹⁰Koma Inu Chauta, mundikomere mtima, mundichiritse kuti ndiŵalange anthuwo.

¹¹Mukatero ndidzadziŵa kuti mumakondwera nane, chifukwa mdani wanga sadandipambane.

¹²Inu mwandichirikiza chifukwa cha kukhulupirika kwanga, mwandikhazika pamaso panu mpaka muyaya.

¹³Atamandike Chauta, Mulungu wa Israele, kuyambira muyaya mpaka muyaya. Inde momwemo. Inde momwemo.