Read Buku Loyera - Chichewa Mas. 44 Bible Online

Mas. 44 - Buku Loyera - Chichewa bible

Mas. 44

¹Kwa Woimbitsa Nyimbo. Ndakatulo ya ana a Kora. Inu Mulungu, ife tidamva ndi makutu athu, makolo athu adatiwuza za ntchito zimene mudagwira pa masiku ao, masiku amakedzana.

²Inu mudapirikitsa mitundu ina ya anthu, koma makolo athu mudaŵakhazika m'dziko lao. Inu mudasautsa mitundu ina ya anthu, koma makolo athuwo Inu mudaŵapatsa ufulu.

³Iwo sadalande dziko ndi lupanga lao, sadapambane pa nkhondo ndi mphamvu zao. Koma adagonjetsa ndi mphamvu zanu, chifukwa cha kuŵala kwa nkhope yanu, pakuti mudakondwera nawodi.

⁴Inu ndinu Mfumu yanga ndi Mulungu wanga, amene mudampambanitsa Yakobe pa nkhondo.

⁵Ndi thandizo lanu tidakantha adani athu. Ndi mphamvu zanu tidapondereza ogalukira.

⁶Sindidalira uta wanga, ngakhale lupanga langa silingandipulumutse.

⁷Koma Inu mwandilanditsa kwa adani athu, mwaŵachititsa manyazi amene amadana nafe.

⁸Takhala tikunyadira mphamvu za Mulungu nthaŵi zonse, ndipo tidzakuthokozani mpaka muyaya.

⁹Komabe Inu mwatitaya, ndipo mwatitsitsa, simunapite nawo limodzi ankhondo athu.

¹⁰Mwalola kuti amaliwongo athu atipirikitse, ndipo adani athu apeza zofunkha kwathu.

¹¹Inu mwatisandutsa nkhosa zokaphedwa, mwatibalalitsa pakati pa mitundu ina ya anthu.

¹²Inu mwagulitsa anthu anu pa mtengo wotsika, ndipo simudapindulepo kanthu ai.

¹³Inu mwatisandutsa anthu onyozeka kwa anzathu oyandikana nafe, anthu otizungulira amatiseka ndi kutinyodola.

¹⁴Inu mwatisandutsa anthu oŵanyodola pakati pa anthu a mitundu ina, anthu omangosekedwa pakati pa anzathu.

¹⁵Tsiku lonse ndimangodziwona kuti ndine munthu wopandapake. Nkhope yanga yagwa chifukwa cha manyazi,

¹⁶pakumva mau a anthu onditonza ndi onditukwana, poona mdani wanga ndi munthu wolipsira.

¹⁷Zonsezi zatigwera, ngakhale kuti sitidakuiŵaleni ndipo sitidaphwanye chipangano chanu.

¹⁸Mtima wathu sudabwerere m'mbuyo, mapazi athu sadaleke kuyenda m'njira yanu.

¹⁹Komabe Inuyo mwatitswanya ndi kutisiya pakati pa nkhandwe ku chipululu, kumene kuli mdima wandiweyani.

²⁰Tikadaiŵala Mulungu wathu, kapena kugwadira mulungu wachilendo,

²¹kodi Mulungu sakadazipeza zimenezi? Paja Iye amadziŵa zinsinsi zonse zamumtima.

²²Koma chifukwa cha Inu, adani akutipha tsiku lonse, pamaso pao tili ngati nkhosa zimene akukazipha.

²³Dzukani, Inu Ambuye. Chifukwa chiyani mukukhala ngati mwagona? Khalani maso, musatitaye kotheratu.

²⁴Chifukwa chiyani mwatifulatira? Mwaiŵaliranji masautso athu ndi kupsinjidwa kwathu?

²⁵Ife tagwa pansi m'fumbi, thupi lathu langoti thapsa pa dothi.

²⁶Dzukani, mubwere kudzatithandiza. Tiwomboleni chifukwa cha chikondi chanu chosasinthika.