Read Buku Loyera - Chichewa Mas. 47 Bible Online

Mas. 47 - Buku Loyera - Chichewa bible

Mas. 47

¹Kwa Woimbitsa Nyimbo. Salmo la ana a Kora. Ombani m'manja inu anthu a mitundu yonse. Fuulani kwa Mulungu poimba nyimbo zachimwemwe.

²Paja Chauta Wopambanazonse, ndi woopsa, ndiye mfumu yaikulu pa dziko lonse lapansi.

³Iye adatigonjetsera anthu ambirimbiri, mitundu ina ya anthu adaiika pansi pa ulamuliro wathu.

⁴Adatisankhulira dzikoli kuti likhale choloŵa chathu, adatipatsa ife anthu a Yakobe dziko lokomali pakuti amatikonda.

⁵Mulungu wakwera, anthu akumfuulira, Chauta wakwera, akumuimbira lipenga.

⁶Imbani nyimbo zotamanda Mulungu, imbani nyimbo zotamanda. Imbani nyimbo zotamanda mfumu yathu, imbani nyimbo zotamanda.

⁷Mulungu ndiye Mfumu ya dziko lonse lapansi. Imbani mwaluso nyimbo zotamanda.

⁸Mulungu amalamulira mitundu ya anthu. Mulungu amakhala pa mpando wake woyera waufumu.

⁹Atsogoleri a anthu a mitundu ina yonse amasonkhana pamodzi ndi anthu a Mulungu wa Abrahamu, pakuti mafumu onse a pansi pano ndi ake a Mulungu, Iyeyo ndiye wamkulu kopambana.