Read Buku Loyera - Chichewa Mas. 49 Bible Online

Mas. 49 - Buku Loyera - Chichewa bible

Mas. 49

¹Kwa Woimbitsa Nyimbo. Salmo la ana a Kora. Imvani izi, inu anthu a mitundu yonse. Tcherani khutu, inu nonse okhala pa dziko lapansi,

²anthu otsika ndi okwera omwe, olemera ndi osauka omwe.

³Zosinkhasinkha za mtima wanga zidzakhala zakuya, ndipo ndidzalankhula zanzeru.

⁴Ndidzakupherani mwambi, ndidzamasulira tanthauzo lake poimba pangwe.

⁵Ndichitirenji mantha pa nthaŵi yamavuto pamene anthu ondizunza akundizinga.

⁶Anthu otero amangokhulupirira chuma chao, amanyada chifukwa ali ndi chuma chambiri.

⁷Zoonadi, palibe munthu amene angadziwombole, kapena kupatsa Mulungu mtengo wa moyo wake.

⁸Popeza kuti choombolera moyo wa munthu ndi chamtengowapatali, ndipo sangathe kuchikwanitsa,

⁹kuti azikhalabe ndi moyo mpaka muyaya osapita ku manda.

¹⁰Zoonadi, aliyense atha kuwona kuti ngakhale anthu anzeru amafa. Chimodzimodzi, anthu opusa ndi opulukira ayenera kufa ndi kusiyira ena chuma chao.

¹¹Manda ao ndiye kwao mpaka muyaya, ndi malo odzakhalako pa mibadwo yonse, ngakhale akadali moyo ankatcha maiko maina ao.

¹²Ngakhale munthu akhale wolemera chotani, komabe adzafa chabe ngati nyama zakuthengo.

¹³Zimenezi ndizo zimene zimaŵagwera anthu amene ali ndi chikhulupiriro chopusa, ndiwo mathero ake a onse amene amatsata maganizo otere.

¹⁴Ayenera kupita ku dziko la akufa ngati nkhosa, ndipo imfa idzakhala mbusa wao. Anthu olungama adzaŵapambana. Adzatsika kulunjika ku manda, matupi ao adzaola, kwao kudzakhala kumanda.

¹⁵Koma Mulungu adzaombola moyo wanga ku ulamuliro wa manda, sindidzaopa, pakuti Iye adzandilandira.

¹⁶Usavutike munthu wina akamalemera, pamene chuma cha m'nyumba mwake chikukulirakulira.

¹⁷Chifukwa pamene munthuyu amwalira, sadzatengapo kanthu. Chuma chake sichidzapita naye limodzi.

¹⁸Ngakhale pamene munthuyo ali moyo, amadziyesa wodala, ndipo ngakhale atamandidwe pamene zinthu zikumuyendera bwino,

¹⁹adzafabe nkukakumana ndi makolo ake onse kumanda, kumene sadzaona kuŵala mpaka muyaya.

²⁰Ngakhale munthu akhale wolemera chotani, komabe akasoŵa nzeru, adzafa chabe ngati nyama zakuthengo.